AQSh prezidenti Djo Baiden dúisenbide jospardan tys saparmen Kievke bardy. Jýrnalister men áleýmettik jeli qoldanýshylary Ýkraina astanasynda tań atqaly birneshe kóshe jabyq turǵanyna nazar aýdarǵan.
20 aqpanda tús aýa Baiden men Vladimir Zelenskiidiń Kievtegi Mihailov shirkeýinde júrgen videosy tarady. Ýkraina basylymdary AQSh prezidenti shirkeýge soǵysta qaza bolǵan ýkrainalyqtar rýhyna taǵzym etýge barǵanyn jazdy.
Keiin Zelenskii Telegram-daǵy arnasynda "Djo Baiden, Kievke qosh keldińiz! Sizdiń saparyńyz – Ýkraina halqyna óte úlken qoldaý" dep alǵys bildirdi.
Baidenniń ózi de "AQSh demokratiiany, Ýkrainanyń aýmaqtyq tutastyǵy men táýelsizdigin tolyq qoldaitynyn rastaý úshin" Kievke kelgenin málimdedi.
Buǵan deiin Ýkraina syrtqy ister ministriniń orynbasary Andrei Melnik Reseidiń Ýkrainaǵa basqynshylyǵynyń bir jyldyǵy qarsańynda "tosyn syi" daiyndalyp otyrǵanyn habarlaǵan.
Áleýmettik jeli qoldanýshylarynyń keibiri, jýrnalister men saiasatkerler Kievke AQSh prezidenti Djo Baiden aldyn ala habarlamai kelýi múmkin degen boljam jasaǵan.
21 aqpanda Djo Baidenniń Polshaǵa sapary bastalady. Al Aq úi Baidenniń Ýkrainaǵa baratynyn habarlaǵan joq.
Sondai-aq Kievke taiaýda ótken Miýnhen konferentsiiasynda Ýkrainany qoldap sóz sóilegen AQSh vitse-prezidenti Kamala Harris kelýi múmkin degen boljamdar bolǵan.
Baqylaýshylar Eýropa odaǵy syrtqy ister ministrleriniń Briýsseldegi kezdesýinde Ýkraina syrtqy ister ministri Dmitrii Kýleba bolmaǵanyna da nazar aýdarǵan.
Ýkrainanyń áýe keńistigi jabyq bolǵandyqtan, Batys elderiniń jetekshileri Kievke temirjolmen qatynaidy. Baidenniń Ýkrainaǵa nemen barǵany belgisiz.
Sonymen qatar Aq úidiń ulttyq qaýipsizdik ókili Djon Kirbidiń málimdeýinshe, Baiden Polshaǵa sapary barysynda reseilikter men prezident Vladimir Pýtinge jeke úndeý joldamaq.
Aita keteiik, Kievte Máskeý ýaqytymen saǵat 12.30-da áýe dabyly iske qosylǵan. Ol Belarýs jerinen "Kinjal" zymyranyn alyp ushatyn MiG-31 ushaǵy áýege kóterilgenine bailanysty bolýy múmkin degen joramal bar.
AQSh prezidentteriniń biri Ýkrainaǵa 2008 jyldan beri birinshi ret baryp otyr. 2008 jyly Kievke kishi Djordj Býsh barǵan bolatyn. Al Baiden Barak Obama ákimshiligi kezinde Ýkrainaǵa vitse-prezident retinde birneshe ret sapar jasaǵan. Resei basqynshylyǵy bastalǵaly Ýkrainaǵa barǵan AQSh-tyń eń úlken joǵary laýazymdy qyzmetkeri – memlekettik hatshy Entoni Blinken.
Eske salaiyq, 24 aqpanda Reseidiń Ýkrainaǵa basyp kirgenine bir jyl bolady.
