QR Eńbek jáne xalyqty áleýmettik qorǵaý ministri Tamara Dúisenovanyń aitýynsha, kóshi-qon saiasatyna qatysty zańnama ózgergeli beri sheteldegi qandastaramyzdyń elge oralý kórsetkishi ósti, dep xabarlaidy Ult.kz tilshisi QazAqparat agenttigine silteme jasap.
"Etnikalyq qazaqtardyń qaita oralýyna, beiimdelýine jáne kirigýine kedergi keltiretin birneshe problemalar ótken jyldan bastap kúshine engen zań aiasynda óz sheshimin tapty. Atap aitsaq, etnikalyq qazaqtarǵa oralman mártebesi qonystaný aimaǵyna qaramastan bir jylǵa berile bastady. Olardyń Qazaqstan Respýblikasy azamattyǵyn alý merzimi tórt jyldan bir jylǵa qysqartyldy. Budan bólek, qandastarymyzdy utymdy qonystandyrý maqsatynda qosymsha eńbek resýrstaryn qajet etetin aimaqtarǵa joldaý sharalary qabyldandy. Nátijesinde ótken jyly elimizge 16,5 myń oralman otbasy kóship keldi. Ol 2015 jylmen salystyrǵanda, 8,5 esege artyq", - dep atap kórsetti Dúisenova Úkimet otyrysynda.
Aita keteiik, Úkimettiń búgingi otyrysynda Tamara Qasymqyzy kóshi-qon saiasatynyń 2017-2020 jyldarǵa arnalǵan tujyrymdamasy jobasyn tanystyrdy. Atalǵan qujatta sheteldegi etnikalyq qazaqtarmen, olardyń ishinde daryndy ári isker azamattarmen tyǵyz bailanys ornatýǵa negizgi basymdyq berilgen. Joǵary bilikti mamandardy jeńildetilgen tártippen jumysqa alý jaiy da qarastyrylǵan.
