Senator Dúisenǵazy Mýsin Úkimet basshysy Álihan Smaiylovtyń atyna joldaǵan depýtattyq saýalynda Katonqaraǵai memlekettik ulttyq tabiǵi parkine qatysty ózekti máselelerdi jariia etti, dep habarlaidy QazAqparat.
Depýtattyń aitýynsha, Katonqaraǵai ulttyq parkiniń materialdyq-tehnikalyq bazasy álsiz jáne kadrǵa zárýlik bar. Normativke sáikes park aýmaǵynda 732 adam jumys isteýi tiis, alaida is júzinde 354 adam eńbek etedi. Sonda ár ormanshyǵa eki ese aýyrtpalyq túsedi. Ulttyq park avtokólikpen 70%, traktorlarmen – 35%, basqa arnaiy tehnikamen 4-ten 20%-ǵa deiin, al inspektorlardy kólikpen qamtý 36% qamtamasyz etilgen. Mundai jaǵdaida erekshe qorǵalatyn tabiǵi aýmaqtardy sapaly qorǵaý men kúzetý múmkindigi az.
Cenatordyń sózine qaraǵanda, vahtalyq ádispen jumys isteitin ormanshylarǵa basqa vahtashylar siiaqty dalalyq jabdyqtaý aqshasy tólenbeidi. Óitkeni, orman sharýashylyǵynyń qyzmetkerleri mundai tólemge quqyǵy bar qyzmetkerler sanatynyń tizbesine kirmeidi.
«Ulttyq parktiń shekteýli sharýashylyq qyzmet aimaǵynda janama orman paidalaný, bal ara sharýashylyǵy, sanitarlyq maqsatta aǵash kesý jáne basqa da qyzmet túrlerine ruqsat berilgen. Alaida, aǵash kesýshilerdi esepke alý men jinaýǵa ruqsat alýdyń qoldanystaǵy júiesi bir jylǵa deiin sozylatyn kóp satyly kelisý rásimderin talap etedi. Sondyqtan da, ýákiletti organnyń ruqsat berý fýnktsiialaryn jergilikti deńgeige berý zańnamalyq turǵydan rettelip, sheshilýi qajet dep esepteimin. Sonymen qatar, jergilikti halyqtyń suranysyna orai, zańnamadaǵy janama paidalaný tizbesine qaraǵai jańǵaqtaryn jinaý da engizilýi tiis», - dep atap ótti Dúisenǵazy Mýsin.
Depýtat sonymen qatar ulttyq park qyzmetkerleriniń eńbekaqysyn arttyrý, ekotýrizmdi damytý úshin infraqurylymdy jańǵyrtý, zamanaýi zerthanalarmen qamtamasyz etý jáne ǵylymi-zertteý jumystaryn jetkilikti qarjylandyrý qajettigin atap ótti.
