Tájikstan astanasy Dýshanbe qalasynda TMD Memleket basshylary keńesiniń kezekti sammiti bastaldy. Sharaǵa QR Prezidenti Nursultan Nazarbaev qatysýda, dep habarlaidy QazAqparat tilshisi.
Tájikstan basshysy Emomali Rahmon sammitke kelgen qonaqtardy «Kohi Somon» rezidentsiiasy aldynda qarsy aldy. Osydan keiin Qazaqstan Prezidenti Nursultan Nazarbaev, Resei Federatsiiasynyń basshysy Vladimir Pýtin, Ózbekstan basshysy Shavkat Mirziioev, Qyrǵystan Prezidenti Sooronboi Jeenbekov, Belarýs basshysy Aleksandr Lýkashenko, Ázerbaijan basshysy Ilham Áliev, Moldova Prezidenti Igor Dodon, Armeniianyń premer-ministri Nikol Pashinian jáne Túrikmenstan premer-ministriniń orynbasary Pýrli Agamýradov zalǵa ótip, shaǵyn quramdaǵy otyrysty bastap ketti.
«Tájikstannyń tóraǵalyǵy kezinde biraz jumystar atqaryldy. Birlesken jumystyń nátijesinde jańa qujattar ázirlendi. Budan bólek, TMD aiasyndaǵy yntymaqtastyqtyń barlyq salalaryn qamtityn sheshimder qabyldandy. Aita ketken jón, bizdiń tóraǵalyǵymyz kezinde salalyq keńesterdiń qyryqqa jýyq otyrystary uiymdastyryldy. Biz ekstremizmge jáne terrorizmge qarsy kúres, esirtkiniń zańsyz ainalymy, ekonomikalyq qylmystar, zańsyz kóshi-qon, adam saýdasy siiaqty baǵyttarǵa basymdyq berdik. Ásirese, ekonomika salasyndaǵy birlesken jumysymyz jemisti boldy. TMD aiasynda mádeni-gýmanitarlyq bailanystardy kúsheitý máselesi de nazardan tys qalmady», - dedi E.Rahmon sammittiń ashylýynda.
Budan ári otyrys jabyq úlgide jalǵasty.
Josparǵa sáikes, búgingi Sammittiń qorytyndysy boiynsha 15 qujatqa qol qoiylady dep kútilýde. Sonyń ishinde eki halyqaralyq kelisim bar. Budan bólek, TMD Memleket basshylary keńesiniń sheshimderine qatysty 13 qujat rásimdelmek. Atap aitqanda, Túrikmenstannyń kelesi jyldaǵy tóraǵalyǵy, Uly Jeńistiń 75 jyldyǵyna daiyndyq sharalary, 2021 jyly Tájikstanda «Dostastyqtyń mádeni astanalary» atty memleketaralyq baǵdarlamany iske asyrý, 2019-2023 jyldar aralyǵynda qylmyspen kúres sharalaryn birlesip júrgizýdiń memleketaralyq baǵdarlamasy, TMD-ǵa múshe memleketterdiń Terrorizmge qarsy ortalyǵy týraly erejeni tolyqtyrý, keńestiń keibir sheshimderin toqtatý, TMD-ǵa múshe Memleket basshylarynyń Dúniejúzilik kóshpendiler oiyndary týraly málimdemesi, jazýshy Shyńǵys Aitmatovtyń 90 jyldyǵyna arnalǵan birlesken málimdeme jáne taǵy basqa qujattar bar.
Aita keteiik, QR Prezidenti Nursultan Nazarbaev Dýshanbege keshe kelgen bolatyn. Memleket basshysy áýejaidan birden «Koxi Samon» rezidentsiiasyna baryp, Tájikstan prezidenti Emomali Rahmonmen kezdesti.
