Jasóspirimder kóbinese durys tamaqtaný erejesin saqtamaidy, bul densaýlyqtyń nasharlaýyna ákelýi múmkin. Balalar men jasóspirimder arasynda jemister men kókónisterdi az jeý, kóbinese tátti sýsyndardy iship, táttilerdi jeý ádeti baiqalady, dep habarlaidy DSM Qoǵamdyq densaýlyq saqtaý ulttyq ortalyǵynyń baspasóz qyzmeti.
QR DSM Qoǵamdyq densaýlyq saqtaý ulttyq ortalyǵynyń ǵylym jáne kásibi damý bóliminiń bas mamany Shynar Abdrahmanova 2020 jyly 4-5 jeltoqsanda Niderlandydaǵy «Excellence of Pediatrics» Pediatriia jónindegi halyqaralyq onlain konferentsiiasynda Qazaqstanda 11-15 jas aralyǵyndaǵy 4864 oqýshyǵa júrgizilgen «Mektep jasyndaǵy balalardyń densaýlyqqa qatysty minez-qulqy», HBSC, saýalnamasynyń nátijelerin kórsetti.
Kún saiyn tańǵy as ishpeitin 11-15 jastaǵy jasóspirimder, kún saiyn tańǵy as ishetinderge qaraǵanda, bas ainalýyna, bas aýrýyna jáne ishtiń aýyrýyna eki ese kóp shaǵymdanady eken. Kókónister men jemisterdi aptasyna 5-6 retten az jeitin jasóspirimderdiń basy jii ainalady jáne ishi aýyrady. Al aptasyna bolmaǵanda 5-6 ret táttilerdi jeý jasóspirimderdiń basyn aýyrtady eken.
«Durys tamaqtanbaityn jasóspirimder arasynda densaýlyqqa qatysty problemalardyń qaýpi artady, sondyqtan qoǵamnyń túrli sektorlarynyń: densaýlyq saqtaý, bilim berý, biznes, azamattyq qoǵam, BAQ jáne basqa da seriktesterdiń qatysýymen únemi durys tamaqtaný máselesin kóterý kerek», - deidi Sh.Abdrahmanova.
