Dúniejúzilik musylmandar qaýymynyń keńesi Shvetsiiada Quran kitaptyń órtelýin synap, dini rámizderdi qurmetteý kerektigin, dinder men hramdardy qorlaý arqyly óshpendilikke jol bermeý qajettigin málimdedi, dep habarlaidy QazAqparat tilshisi Birikken Arab Ámirlikteriniń WAM jańalyqtar agenttigine silteme jasap.
Dúniejúzilik musylmandar qaýymynyń keńesi dúisenbide jariialaǵan málimdemede Shvetsiiada kórinis tapqan musylman qaýymyna degen tózimsizdik pen óshpendilik tolqyny áleýmettik yntymaqqa qaýipti qubylys ekenin aitty. Keńes Eýropadaǵy musylmandar qaýymyn arandatý áreketterine boi urmaýǵa, Islam danalyǵynyń úlgisi bolyp, zańdardy saqtaýǵa, áleýmettik qaýipsizdik pen tatýlyqty tý etýge shaqyrdy.
Birqatar arab elderi Qurannyń kóshirmesin órtep, aktsiia ótkizgen Hard Line partiiasynyń jetekshisi, saiasatker Rasmýs Palýdannyń áreketin qatań synaǵan bolatyn. Ótken beisenbide osy partiianyń músheleri birneshe qalada Quran kitapty órtegen videolar taratqan edi.
Iordaniia, Saýda Arabiiasy, Bahrein, Túrkiia, Katar, Pákistan, BAÁ, Mysyr jáne Oman elderi bul aktsiiany «islamǵa degen fobiia» dep baǵalady. Al Iran men Iraktaǵy Shvetsiianyń elshileri Syrtqy ister ministrligine shaqyrylǵan bolatyn. Irannyń syrtqy ister ministrligi qalyptasqan kikiljińge Shvetsiianyń Úkimeti jaýapty ekenin málimdep, resmi Stokgolmdi shuǵyl sharalar qabyldap, mundai aktsiialardy tyiýǵa shaqyrdy. Al Iraktyń Syrtqy ister ministrligi mundai sharalardyń «Shvetsiia men arab-musylman áleminiń arasyndaǵy qarym-qatynasqa zardabyn tigizetinin» atady.
Onsyz da ýshyǵyp turǵan shielenis Palýdannyń Quran kitapty kópshiliktiń kózinshe órteitin aktsiialardyń jalǵasy bolatynyn aitqannan keiin odan beter órshigen. Osy sózden keiin shvetsiialyq musylmandar men politsiia ókilderiniń arasynda qatyǵys bolyp, onyń sońy tártipsizdikterge ulasty.
Al-Bawaba aqparat portalynyń jazýynsha, Shvetsiianyń premer-ministri Magdalena Andersson tolassyz tártipsizdikterge jaýap retinde Rasmýs Palýdanǵa ondai sharalar ótkizýge tyiym sala almaityndaryn málim etken. Óitkeni bul eldiń zańdary azamattary óz oiyn esh kedergisiz bildirýge múmkindik beredi.
TASS agenttiginiń málimeti boiynsha, Rasmýs Palýdan Hard Line partiiasynyń negizin 2017 jyly qalaǵan. Saiasatkerdiń ózi YouTube-tegi antiislamistik videolarymen tanymal. Ol Quran kitapty órtep turyp, muny sóz erkindigine degen qurmet dep ataǵan edi. Palýdan jetekshilik etetin partiia elde islamǵa tyiym salyp, Daniiadan pana tapqan «batystyq emes tulǵalardyń» bárin deportatsiialaýdy talap etip júr.
