Foto:gov.kz
Qazaqstan ulttyq quramasy Dúniejúzilik kóshpendiler oiyndarynyń ekinshi jarys kúnin 14 altyn, 3 kúmis, 8 qola medalmen aiaqtady.
Qazaq kúresinen qatysqan 8 sportshynyń barlyǵy altyn medal aldy. Al jamby atýdan úsh oryndy da ulttyq qurama sportshylary ielendi.
«Qazanat» ippodromy mańyndaǵy etnoaýylda ótken Jamby atý sportynyń Aziia stilinen júldeli úsh oryndy da qazaqstandyq sportshylar jeńip aldy. Batyr Beksaýyt – altynǵa, Aitbek Sarybai kúmis júldege ie bolsa, qola medaldi Eralhan Aikóz enshiledi.
Qazaqstandyq sportshylar aýdaryspaqtan úsh salmaq dárejesinde de altyn medal aldy. 60 kelide Ermek Quralbai, 70 kelide Almat Látipbek, 80 kelide Daryn Ótkelbai jeńimpaz atandy.
«Arǵymaq» at-sport kesheninde ótken dástúrli sadaq atýdan áielder arasynda Aikórkem Batihan qola júldege ie boldy. Al erler arasynda qos birdei qazaqstandyq finalǵa shyǵyp, Qasymhan Qanat qola medal ielense, Jánibek Qulmyrzaev altyn medal aldy.
Jaqsylyq Úshkempirov atyndaǵy Jekpe-jek saraiynda qazaq kúresinen erler men áielder árqaisy tórt salmaq dárejesinde synǵa tústi. Áielder arasynda 48 kelide Aijan Jylqybaeva, 52 kelide Nazerke Azamatova, 56 kelide Raýza Nurmahambetova, 60 kelide Baqyt Qusaqbaeva altyn medal aldy. Al erler arasynda 55 kelide Bekjan Tólepov, 60 kelide Meiirjan Bereketov, 66 kelide Didar Tuqyshev, 74 kelide Jumajan Qojambekov altyn medalǵa ie boldy.
«Alaý» muz aidyny saraiynda kýrashtan, mas-restlingten jáne asyq atýdan báseke ótti. Kýrashtan qazaqstandyq 6 sportshy júldege ie boldy. 87 keli salmaqta Albina Bahieva altyn júlde alsa, 79 keli salmaqta Ajar Salyqova men +100 kelide Marat Baikamýrov kúmis júldeni enshiledi. 81 keli salmaqta Erzat Arǵynov, 81 keli salmaqta Bekádil Shaimerdenov pen 87 keli salmaqta Ulbolsyn Adilova qola júlde aldy.
Saha halqynyń ulttyq sporty mas-restlingten erler arasynda 65 keli salmaqta Birimjan Asylmurat pen áielder arasynda 55 keli salmaqta Tahmina Qojamberdieva qolda júlde ielendi.
«Qazanat» ippodromynda ótip jatqan kókpardan irikteý kezeńinde Qazaqstan Ózbekstandy 16-0 esebimen jeńdi. Al kókbóriden ulttyq qurama sportshylary AQSh komandasymen kezdesip, 18-0 esebimen aiqyn basym tústi.
Asyq atý men toǵyzqumalaqtan da irikteý jarystary ótti.
