Petropavl jáne Kókshetaý qalalarynda «Elektr energetikasyn damytý jáne energiia únemdeý institýty» AQ iske asyryp jatqan «Qazaqstanda energiia tiimdiligin arttyrý» jobasynyń nysandary boiynsha Dúniejúzilik banktiń Turaqty ókili Jan-Fransýa Martonyń eki kúndik sapary aiaqtaldy, dep habarlaidy "Ult aqparat" QR Indýstriia jáne infraqurylymdyq damý ministriginiń baspasóz qyzmetine silteme jasap.
Nysandardyń biri-olimpiadalyq rezervtiń Soltústik Qazaqstan sport-internat-kolledji, onda bir kezderi tanymal qazaqstandyq sportshy Aleksandr Vinokýrov oqyǵan. Joba aiasynda ǵimarattyń shatyry men qabyrǵalary jylytyldy, jylý pýnkti avtomattandyryldy, jaryqtandyrý balalardyń turýy men oqýy úshin únemdi júiemen aýystyryldy.
Kókshetaý qalasyndaǵy «Bilim-Innovation» litsei-internatynda, daryndy balalarǵa arnalǵan №3 oblystyq mektep-internatynda jáne erekshe qajettilikteri bar balalarǵa arnalǵan №1 túzetý mektebinde de ǵimarattardy jańǵyrtý boiynsha qajetti jumystar júrgizildi. Nátijesinde jylý men elektr energiiasynyń shyǵyndaryn 10-12% únemdeý baiqalady.
Óz kezeginde Dúniejúzilik banktiń Turaqty ókili Jan-Fransýa Marto jekelegen merdigerler men ákimdiktiń jumystardy qosymsha qarjylandyrý jónindegi jeke bastamasyn atap ótti. Birlesken kúsh-jigerdiń arqasynda ǵimarattar qazir energiia tiimdiliginiń barlyq talaptaryna jaýap beredi.
Sondai-aq, sapar qorytyndysy boiynsha «Elektr energetikasyn damytý jáne energiia únemdeý institýty» AQ Basqarma tóraǵasynyń orynbasary Serik Týrchekenov «Qazaqstanda energiia tiimdiligin arttyrý» jobasy energiia shyǵyndaryn únemdeýdi jáne energiia tiimdiligin arttyrý jónindegi sharalardyń qarjylyq ómirsheńdigin kórsetetinin atap ótti. Dúniejúzilik banktiń qoldaýynyń arqasynda ár túrli aimaqtardaǵy 80 áleýmettik nysan jańǵyrtýdan sátti ótti.
«Qazaqstanda energiia tiimdiligin arttyrý» jobasy eki komponentten turady. Birinshiden bul memlekettik jáne áleýmettik mańyzy bar obektilerdiń energiia tiimdiligin arttyrýǵa baǵyttalǵan jumystar.
«Elektr energetikasyn damytý jáne energiia únemdeý institýty» AQ mamandarynyń derekteri boiynsha, energiialyq tiimdi deńgeiine ótý múmkindigine mektepter, balabaqshalar men aýrýhanalar ie boldy. Memlekettik mekemelerdi tańdaý konkýrstyq negizde júrgizildi.
