Ýaqytsha ustaý oqshaýlaǵyshynda kóz jumǵan Dýlat Aǵadildiń advokaty men aǵasy máiitti tekserý kezinde qasynda turǵan. Bul týraly Nur-Sultan qalasynyń prokýratýrasynda ótken brifingte aityldy, dep habarlaidy "Ult aqparat".
Qala prokýrorynyń orynbasary Eldos Kelimjanov "Aǵadildi tergeý izoliatorynda azaptaǵan" degen aqparatty joqqa shyǵaryp, onyń denesindegi "daqtardy" biologiialyq ólim belgileri dep atady.
«Birinshi kezekte Aǵadildiń mezgilsiz ómirden ótýine bailanysty jaqyndary men týystaryna kóńil aitamyz. Áleýmettik jeli men internet resýrstarda Aǵadildiń máiitin jýyndyrý rásimin videoǵa túsirip, oǵan kúsh kórsetkeni týraly aqparat tarap jatyr. Bul - etika men moralǵa qarsy keletin áreket. Videomaterial men onyń taralyp ketýi qaitys bolǵan adamnyń týystarynyń ruqsatynsyz júzege asyrylǵan.
Videomaterialdarda máiitte daqtar bary aitylady. Ony dene jaraqaty dep ataidy. Munda onyń paida bolý sebebin túsindire alatyn mamandar bar. Máiittegi daqtar - bul biologiialyq ólimniń belgileri. Meditsinalyq tilmen aitqanda, daqtar adamnyń júregi toqtaǵannan keiin keminde bir saǵat ótkennen keiin paida bolady», - deidi Nur-Sultan qalasy prokýrorynyń orynbasary Eldos Qilymjanov.
Onyń aitýynsha, bastapqyda Aǵadildiń denesin Talapker aýyldyq aýrýhanasy men tergeý izoliatorynyń dárigerleri qarap shyǵyp, "soqqy izderin" tappaǵan. Oqiǵaǵa qatysty qozǵalǵan qylmystyq is aiasynda sot meditsinalyq saraptama taǵaiyndalǵan.
«Aǵadildi Aqmola oblysynyń politsiia qyzmetkerleriniń tutqyndaýy sot sanktsiiasy negizinde júzege asyrylǵan. Belgilengen tártip boiynsha, Dýlat Aǵadildi Talapker aýylynyń emhanasyndaǵy jáne tergeý izoliatoryndaǵy meditsinalyq qyzmetkerler qaraǵan. Kúsh qoldanǵandyǵyn bildretin dene jaraqattary bolmaǵan. Qylmystyq isti tergeý aiasynda sot-meditsinalyq saraptama taǵaiyndaldy. Qaitys bolǵan adamnyń otbasyna advokat usynyldy jáne sot-meditsinalyq saraptama salasynda eki maman jumysqa tartyldy. Olar memlekettik sot saraptamalyq qyzmettiń músheleri emes», - deidi ol.
Sondai-aq, prokýror orynbasary máiitti tekserý jumystary qalai júrgizilgenin aitty.
«Kelesi kúni máiitti tekserý Aǵadildiń aǵasynyń, advokattyń jáne eki meditsinalyq maman - Arman Ahanbetov pen Rýslan Satybaldievtiń qatysýymen ótti. Máiitti tekserý qorytyndysy boiynsha, Aǵadildiń aǵasy men advokat Azanovtyń eshqandai shaǵymy bolǵan joq. Máiitti soiý jáne zertteý barysy videoǵa túsirilgen, ony etikalyq sebepterge jáne týysqandary ruqsat etpegenine bailanysty jariialai almaimyz. Aldyn ala boljanǵan qorytyndyny buǵan deiin aitqanbyz: Aǵadildiń ólimine júrek-qan tamyry aýrýy sebep bolǵan. Sot saraptamasynyń túpkilikti qorytyndysy jaqyn arada laboratoriialyq zertteýden keiin belgili bolady», - dedi ol.
Eldos Qilymjanovtyń aitýynsha, 26 aqpanda barlyq jaǵdaidy tergeýdiń obektivtiligin qamtamasyz etý úshin qylmystyq is Nur-Sultan qalasy prokýratýrasynyń arnaiy prokýrorlar basqarmasynyń óndirisine qabyldandy. Qazir barlyq qajetti tergeý amaldary júrip jatyr.
Eske sala ketsek, 25 aqpanda qoǵam belsendisi Dýlat Aǵadil Nur-Sultan qalasyndaǵy tergeý izoliatorynda kóz jumdy.
Qalalyq Politsiia departamenti Dýlat Aǵadildiń ólimine qatysty sotqa deiingi tergeý amaldaryn bastaǵan.
