4 qyrkúiekte Qaraǵandy qalasyndaǵy tergeý izoliatorynda "Drevnii Rim" meiramhanasynda biyl qańtardyń 1-ine qaraǵan túni bolǵan tóbeleske bailanysty aldyn ala sot tyńdaýy ótti. 23 jastaǵy jergilikti turǵyn qaza tapqan oqiǵanyń sońy Qaraǵandyda iri narazylyqqa ulasqan.
Kóshpeli sot tyńdaýy ótken AK-159/1 mekemesi aldynda tańerteńnen beri kóp politsiia qyzmetkeri júrdi. 13 aiyptalýshynyń bári "top bolyp, buzaqylyq jasady" dep aiyptalyp otyr. Iýsif N. esimdi aiyptalýshyǵa "buzaqylyq" babymen qatar "adam óltirý" baby boiynsha da aiyp taǵylǵan.
12 aiyptalýshy qamaýda: Arman jáne Hachatýr O., aǵaiyndy Iýsif jáne Vasif N., David G., Armen H., Kair N., Bolat J., Sohak M., Tigran S., Torgom M., Jasýr P. Taǵy bir sottalýshy Ilia Sh.-ǵa bas bostandyǵyn shekteýmen bailanysty emes bultartpaý sharasy qoldanylǵan. Aiyptalýshylar - 19 ben 46 jas aralyǵynda.
Alǵashqy sot tyńdaýy kezinde aiyptalýshylar men olardyń advokattary is materialdarynda "zańbuzýshylyqtar" bolǵandyqtan isti prokýratýraǵa qaitarý týraly ótinish jasady. Olar sonymen birge qamaýdaǵy azamattardy bosatýdy surady. Jábirlenýshiler bul ótinishti qoldamady.
13 aiyptalýshynyń biri aldyn ala sot tyńdaýy kezinde ózin azaptaǵanyn aitty.
- Meni ustaý kezinde uryp-soqty jáne moiyndaýǵa májbúrledi. Men moiyndaǵan joqpyn. Buǵan qosa, tintý kezinde páterdegi kir jýǵysh máshinege pyshaq salyp jiberdi, - dedi aiyptalýshy Kair N.
Sýdia Shárip Sisembaev ótinishke bailanysty sheshim shyǵarý úshin 6 qyrkúiekke deiin úzilis jariialaitynyn aityp, shyǵyp ketti. Sýdia azaptaý boiynsha jeke sheshim qabyldanatynyn jetkizdi.
Biyl 1 qańtarǵa qaraǵan túni Qaraǵandy qalasyndaǵy "Drevnii Rim" meiramhanasy aldynda eki top arasyndaǵy tóbeles kezinde 23 jastaǵy Raqymjan Janseiit pyshaqtalyp, mert bolǵan. Úsh adam aýrýhanaǵa túsken.
Politsiia boljamy boiynsha, meimandarǵa meiramhananyń jabylatyny týraly aitylǵan eskertýden keiin bir-birimen sózge kelisip qalǵandar keiin esik aldyna shyǵyp tóbelesken. Qantógispen aiaqtalǵan bul oqiǵa qalada rezonans týǵyzyp, Qazaqstannan tys jerde de oǵan reaktsiia tanytqan. Oǵan tóbeleske armian diasporasy ókilderiniń qatysqany jaily messendjerler men áleýmettik jelilerde taraǵan aqparat sebep bolǵan. Qazaqstan men Armeniia bilikteri bul oqiǵany turmystyq janjal dep atap, "oǵan ultaralyq sipat berýge tyrysýdan bas tartýǵa" shaqyrǵan.
Raqymjan Janseiit jerlengennen keiin qoǵam ókilderi onyń qazasyna bailanysty tergeý jaily aqparat berýdi talap etti. 6 qańtarda Qaraǵandy qalasynyń ortalyǵyna júzdegen adam jinalyp, "isti ádil tergeýdi" talap etti. Narazylarmen kezdesken oblys ákimi Erlan Qoshanov istiń sońyna deiin tekseriletinin aityp, "ákim retinde, prezidenttiń ókili retinde de" ýáde berdi. Ákim "kúdiktilerdiń biri 1 qańtar keshkisin Reseige ketip qalǵan" dep habarlady. 7 qańtarda internette jariialanǵan videoúndeýde qylmysqa kúdikti retinde izdeý jariialanǵan adam meiramhana aldyndaǵy tóbeleske qatysqanyn, biraq "eshkimdi óltirmegenin" málimdegen. Ol bilikke berilýge daiyn ekenin aityp, ádil tergeý júrgizýdi surady. Oǵan jaýabynda Qazaqstan ishki ister ministrligi "obektivti tergeý júrgizýge" ýáde berip, kúdiktige óz erkimen berilý týraly usynys jasady. Keiin ishki ister ministrligi ol adamnyń Reseide ustalǵanyn habarlaǵan edi. Jábirlenýshi taraptyń advokaty Azattyqqa "kúdiktini ekstraditsiialaý máselesi qarastyrylyp jatqanyn" habarlaǵan bolatyn.
