Táýelsiz Memleketter Dostastyǵy elderiniń saýda-ekonomikalyq bailanystaryn jandandyrý qajet. Bul týraly TMD uiymyna múshe memleketter basshylary keńesiniń kezekti otyrysynda Qazaqstan Prezidenti Qasym-Jomart Toqaev aitty, dep habarlaidy QazAqparat.
«Saýda-ekonomikalyq yntymaqtastyqty jandandyryp, ulǵaitý birinshi kezekti mindet. Birqatar bedeldi halyqaralyq uiymnyń málimeti boiynsha TMD memleketteriniń óńirshilik taýar ainalymy 91 mlrd dollardy nemese álemdik saýda deńgeiiniń 0,5 paiyzyn ǵana quraidy. Bul rette Dostastyq elderiniń ózara saýda úlesi bizdiń memleketterimizdiń syrtqy álemmen jalpy taýar ainalymynyń shamamen 20 paiyzyn alyp otyr», - dedi Qasym-Jomart Toqaev.
QR Prezidentiniń atap ótýinshe, bul kórsetkishter Dostastyq elderi saýda-ekonomikalyq bailanysty aitarlyqtai arttyrýy úshin mol áleýettiń bar ekenin kórsetedi.
«Sondyqtan ekonomikalyq ózara is-qimyldyń qazirgi ádisterin oi eleginen ótkizip, jetildirý úshin birlesken úlken jumys atqarý qajet»,- dedi Memleket basshysy.
