Búgin Úkimet otyrysynda biylǵy jeti aidaǵy áleýmettik-ekonomikalyq damýdy talqylaý kezinde Ulttyq bank tóraǵasy Erbolat Dosaev teńge baǵymyna qatysty túsinik berdi, dep habarlaidy QazAqparat.
«Biylǵy jylǵy shildede teńge baǵamy munai baǵasynyń ósýi aiasynda bir AQSh dollary úshin 424,45 teńgege deiin 0,7%-ǵa nyǵaidy. Shilde aiyndaǵy qubylmalylyqqa qaramastan, munai baǵasyn belgileý 76,33 AQSh dollaryna deiin 1,6 paiyzǵa ósti. OPEK+ tamyzdan bastap munai óndirýdi ai saiyn ulǵaitý týraly ýaǵdalastyqqa kelisýi, sondai-aq AQSh-taǵy qorlardyń tómendeýi jáne otynǵa suranystyń ósýi týraly derekter munai baǵasyn qalyptastyrýǵa yqpal etken negizgi faktorlarǵa jatady», - dedi Dosaev.
Onyń aitýynsha, transfertter bólý úshin Ulttyq qor aktivterin konvertatsiialaý, kvazimemlekettik sektordyń 480 mln AQSh dollary somasyna satylymdary jáne eksporttaýshylardyń salyq tólemderi kezeńinde birjalyq naryqta valiýtalyq túsimdi konvertatsiialaýy teńgege qosymsha qoldaý kórsetti.
«Iskerlik belsendiliktiń qalpyna kelýi aiasynda tutyný taýarlary importynyń joǵary ósý qarqyny shetel valiýtasyna shamadan tys suranys týdyrýdy jáne teńgeniń nyǵaiýyna shekteýshi áser etýdi jalǵastyrýda. Biylǵy jylǵy tamyzdyń basynan bastap koronavirýstyń delta-shtamymen aýrýdyń ósýi aiasynda jahandyq ekonomikanyń perspektivalary boiynsha belgisizdikke bailanysty munai naryǵynda qysym kúsheie tústi», - dedi UB basshysy.
Onyń sózine qaraǵanda, munaidyń qubylmalylyǵy jáne táýekel-sentimenttiń ózgerýi teńgeniń aiyrbastaý baǵamyna qysym kórsetýin jalǵastyrýda.
