Búgin Úkimet otyrysynda Ulttyq bank tóraǵasy Erbolat Dosaev Memleket basshysynyń Joldaýyn iske asyrý baǵytynda infliatsiiaǵa qatysty qadamdardy baiandady, dep habarlaidy "Ult aqparat".
«Memleket basshysynyń biylǵy 1 qyrkúiekte aitylǵan Qazaqstan halqyna Joldaýyn iske asyrý maqsatynda Ulttyq bank Úkimetpen birlesip 2022 jyly infliatsiiany 4-6% nysanaly dálizge qaitarýǵa airyqsha kóńil bóletin bolady. Memleket basshysy Joldaýda monetarlyq emes faktorlar áseriniń ulǵaiýyn, ásirese azyq-túlik baǵasynyń óskenin atap ótti. Biylǵy 8 aidyń qorytyndysy boiynsha, ishki óndiris qajettiliginiń resmi qamtylýyna qaramastan, jekelegen naryqtardaǵy turaqty teńgerimsizdik nátijesinde azyq-túlik infliatsiiasynyń ósýi 11,4 paiyzdy qurady. Maýsymaralyq kezeńde kartop pen sábizdiń baqylaýsyz eksportyna bailanysty olardyń jazǵy ailarǵa tán baǵaǵa qaraǵanda, baǵalarynyń kúrt ósýi jáne sonyń saldarynan ishki naryqta defitsittiń paida bolýy osy jyldyń aiqyn kórinisi bolyp otyr», - dedi Dosaev.
Onyń aitýynsha, joǵaryda kórsetilgen faktorlardyń negizinde Memleket basshysynyń tapsyrmasyn iske asyrý úshin azyq-túlik baǵasynyń ósýine qarsy kúreste Úkimet pen ákimderdiń negizgi kúsh-jigerin taýar óndirisiniń, eksport pen import balansyn eskere otyryp, ishki naryqty jan-jaqty tolyqtyrýǵa jumsaý kerek.
«Infliatsiiany 2022 jyly nysanaly dálizge qaitarý boiynsha Joldaýda qoiylǵan mindetterdi tiimdi túrde sheshý úshin 2021-2023 jyldarǵa arnalǵan infliatsiiaǵa qarsy áreket etý sharalarynyń kesheni ázirlenip, kelisýdiń sońǵy satysynda tur. Makroekonomikalyq saiasatty úilestirý jónindegi 2021-2023 jyldarǵa arnalǵan kelisimmen birge bul sharalar infliatsiianyń azyq-túlikke jatatyn jáne azyq-túlikke jatpaityn bólikteriniń monetarlyq emes faktorlaryn aitarlyqtai tómendetýdi qamtamasyz etýge, orta merzimdi negizde boljamdy jáne teńgerimdi tariftik saiasatty qamtamasyz etýge tiis», - dedi UB basshysy.
