Almatynyń jańa ákimi Erbolat Dosaev óziniń taǵaiyndalýy jáne qala basshysy retinde sheshýdi josparlap otyrǵan mindetteri týraly aitty, - dep habarlaidy Tengrinews.kz tilshisi Almaty.tv saityna silteme jasap.
Prezident Ákimshiligi basshysy qala aktivine Almatynyń jańa ákimin tanystyrdy.
"Bul maǵan erekshe qurmet jáne erekshe jaýapkershilik. Sizdermen qańtardaǵy qaiǵyly oqiǵalardan aman ótip, qalamyzdy kórkeitip, odan da jaqsy jáne tek Almatyǵa tán ómir saltyn qaitarýǵa bar kúsh-jigerimizdi salamyz dep senemin", - dedi Almaty ákimi Erbolat Dosaev.
Erbolat Dosaev – Almaty qalasynyń týmasy. Ol Ulttyq bankti 2019 jyldyń aqpanynan beri basqaryp keledi. Oǵan deiin ár jyldary Qarjy, Densaýlyq saqtaý, Ekonomikalyq damý jáne saýda, Ekonomika jáne biýdjettik josparlaý, sondai-aq Ulttyq ekonomika ministrlikterin basqaryp, vitse-premer qyzmetin atqarǵan.
"Bizdiń aldymyzda turǵan jańa mindetter ákimdik qyzmetine jańa kózqarastardy, tyń serpin berýdi talap etedi. Sondyqtan, Erbolat Asqarbekuly, eń úlken shahar Prezident tarapynan sizge senip, tapsyrylyp otyr", - dedi Prezident Ákimshiliginiń basshysy Erlan Qoshanov.
Jumys tájiribesin eskere otyryp, qala aktiviniń jańa ákiminen kútetin úmiti zor. Megapolis ulttyq draiver rólin, sonyń ishinde ony jalpyulttyq ekonomikanyń lokomotivke ainaldyrý mindetin atqarýǵa tiis.
"Jańa ákimniń qarjyger, ekonomist retinde úlken tájiribesi bar. Sońǵy qyzmeti - Ulttyq bank basshysy. Bul baǵytta qalany bárimiz birge belsendi túrde damytamyz dep oilaimyn", - dedi ÁKK "Almaty" AQ basqarma tóraǵasy Asqar Bilisbekov.
Depýtattardyń aitýynsha, basty nazar qalany qalpyna keltirýge, shaǵyn orta biznesti damytýǵa jáne halyqtyń tabysyn arttyrýǵa aýdarylýy tiis.
