«QR Qoǵamdyq baqylaý týraly» zań jobasy kerek. Bul týraly qoǵam qairatkeri Dos Kóshim aitty, dep habarlaidy "Ult aqparat".
«Zań kerek. Sebebi, qoǵamdyq uiymdardyń, azamattyq qoǵamnyń negizgi baǵyty - ol monitoring júrgizý, baqylaý. Shyndyǵynda memlekettiń qarajaty qaida ketip jatyr, ministrlikter qalai jumys istep jatyr, qandai baǵyt bar? Osylardyń bárin baqylap otyrady. Sondyqtan bul zań sózsiz kerek», - deidi Dos Kóshim.
Qoǵam qairatkeriniń pikirinshe, aýyldyq jerlerde yntaly top qurý kerek.
«Mysaly, keibir aýyldarda qoǵamdyq uiym joq. Onda bolyp jatqan jemqorlyq siiaqty basqa da máselelerdi qalai baqylaidy. Múmkin jergilikti máslihatpen birige otyryp, yntaly top baqylaý kerek shyǵar. Mysaly on shaqty adamnan turatyn yntaly top qurý qajet», - deidi ol.
Aita keteiik, búgin Aqparat jáne qoǵamdyq damý ministri Aida Balaeva Almaty qalalyq Qoǵamdyq keńes múshelerimen kezdesip, «QR Qoǵamdyq baqylaý týraly» zań jobasyn talqylady.
