Petropavl turǵyny taksi júrgizýshisiniń dórekiligine shaǵymdanǵan. Alaida shaǵymdy tekserý barysynda politseiler júrgizýshiniń kóshi-qon zańnamasyn buzǵanyn anyqtap, isti sotqa jetkizdi, dep habarlaidy ult.kz.
Polisia.kz málimetinshe, 42 jastaǵy shetel azamaty Qazaqstanda jolaýshylar tasymalymen ainalysqan. Biraq elge kirgen kezde kelý maqsatyn jumysqa ornalasý nemese kásipkerlik qyzmet retinde kórsetpegen.
Sonymen qatar, onyń buǵan deiin de kóshi-qon zańnamasyn buzǵany úshin ákimshilik jaýapqa tartylǵany anyqtaldy. Quqyq buzýshylyqtyń bir jyl ishinde qaitalanýyna bailanysty politsiia materialdardy sotqa joldady.
Sot shetel azamatyna bir táýlik ákimshilik qamaý taǵaiyndap, keiin Qazaqstannan májbúrli túrde shyǵarylýyna sheshim shyǵardy. Buǵan qosa, onyń elge qaita kirýine bes jylǵa tyiym salyndy.
Politsiianyń málimetinshe, jyl basynan beri Soltústik Qazaqstan oblysynda 679 shetel azamaty ákimshilik jaýapqa tartylǵan. Onyń 633-i kóshi-qon zańnamasyn buzǵany úshin jazalanǵan.
Osy kezeńde 45 shetel azamaty Qazaqstannan shyǵarylyp, taǵy 152 adamnyń elde bolý merzimi qysqartylǵan.
