Doping qabyldady dep aiyptalǵan qazaqstandyq sportshylardy syiaqylary men páterlerinen aiyrmaidy. Bul týraly mádeniet jáne sport vitse-ministr Sáken Musaibekov baspasóz máslihatynda málimdedi, - dep habarlaidy kaz.tengrinews.kz tilshisi.
"Osyndai jaǵdai boldy, endi ne isteimiz? Kónemiz. Al syiaqylar men páterlerge bailanysty bizde tartyp alatyn ereje joq. Sportshy dopingpen ustalǵan jaǵdaida buryndary alǵan syiaqylarynan aiyrylady degen ereje joq", - dedi vitse-ministr.
Alaida vitse-ministr budan bylai doping qoldanǵandardy qylmystyq jaýapkershilikke tartýdy usyndy. "Biz qazir parlamentte dene shynyqtyrý boiynsha zańǵa ózgeris engizgimiz keledi. Doping qoldanýdyń jazasyn qylmystyq jaýapkershilikpen bailanystyrsaq deimiz. Jaza sportshyǵa, bapkerge, dárigerge, osy preparattardy jetkizgen adamdarǵa qarastyrylady. Ózderińiz túsinip otyrsyzdar, jariialanǵan preparattar óte qaýipti. WADA 10 myńǵa jýyq preparatty jariia etti, ony sportshylardyń qoldanýyna tyiym salynǵan. Sondyqtan sportshynyń ainalasyndaǵy adamdar da qylmystyq jaýapkershilikke tartylady. Sot kimdi aiypty dep tanysa, sol jazalanady", - dedi Sáken Musaibekov.
Eske salaiyq, Svetlana Podobedova, Zúlfiia Chinshanlo jáne Maiia Maneza Olimpiada medaldarynan aiyryldy. Olar London Olimpiadasynda óz salmaq dárejesinde altyn medal jeńip alǵan bolatyn. Jaqyn arada Podobedova, Chinshanlo jáne Maneza altyn medaldardy qaitarýy tiis. Olardyń qatysqan jarystary qaita qaralatyn boldy. Sonymen qatar, Osyǵan deiin HOK Olimpiada-2008 oiyndarynyń kúmis júldegeri Taimýraz Tigievtiń medalin qaitaryp alǵan bolatyn. Ruqsat etilmegen zattar qaita tekserilýden keiin anyqtalǵan, HOK WADA-men birge bul tekseristerdi osy jyldyń basynan bastap ótkizip keledi.
"Bul chempiondardyń bárin mazaq etý" - dep málimdeme jasaǵan bolatyn QR Aýyr atletika quramasynyń bas bapkeri Aleksei Ni doping daýy týraly.
