2014 jyly 17 shildede Donbass aspanynda jarylǵan Malaiziianyń "Boing" ushaǵyna bailanysty sot protsesinde prokýror aiyptaý qorytyndysyn jariialady. Bul is boiynsha sot 9 naýryzda Niderlandyda bastalǵan.
Ushaq apatyn zerttegen halyqaralyq tergeý toby "ushaqty Resei áskeri bóliminen Ýkrainanyń shyǵysyna kirgen «Býk» zymyranymen atyp qulatqan" degen qorytyndyǵa kelgen edi. Osyǵan bailanysty Reseidiń úsh azamaty - Igor Girkin (Strelkov), Sergei Dýbinskii, Oleg Pýlatovqa jáne Ýkrainanyń bir azamaty - Leonid Harchenkoǵa aiyp taǵylǵan. Olardyń barlyǵynyń da "Reseidiń qoldaýymen Ýkraina armiiasyna qarsy urys júrgizgen Donbastaǵy separatistermen bailanysy bar" degen qorytyndy jasalǵan. Ushaq apatqa ushyraǵan sátte Strelkov separatister kúshteriniń basshysy bolǵan, oǵan baǵynyshty Dýbinskii barlaýdy basqarǵan. Al Pýlatov pen Harchenko "Býkty" Donbasqa ákelgender qatarynda atalǵan.
Taǵylǵan aiypty moiyndamaǵan aiyptalýshylar sotqa kelmedi. Tek Oleg Pýlatovtyń eki advokaty iske qatysyp otyr.
Malaiziianyń apatqa ushyraǵan "Boing" ushaǵyndaǵy 298 adam qaza bolǵan. Olardyń deni Niderlandy azamattary. Niderlandy men Avstraliia Reseidi kinásin moiyndaýdy talap etken, biraq Máskeý ony teriske shyǵarǵan. Sýdianyń sózinshe, sot isi 2021 jylǵa deiin sozylýy múmkin.
