Kabýldaǵy teraktiden soń AQSh Prezidenti Donald Tramp Aýǵanstan Prezidenti jáne táliptermen kezdesýden bas tartty. 8 qyrkúiekke josparlanǵan kezdesý Vashington mańyndaǵy Tramptyń "Kemp-Devid" rezidentsiiasynda ótýi tiis bolǵan.
Kabýldaǵy shabýyldy "Taliban" terroristik uiymy moinyna aldy. Osy aptada Aýǵanstan astanasynda bolǵan jarylystan 12 adam qaza tapqan. Olardyń arasynda bir amerikalyq sarbaz bolǵan.
Tramptyń sózinshe, josparlanǵan kezdesý jaily eshkim bilmegen. "Taliban" jetekshileri men Aýǵanstan prezidenti "Kemp-Devid" rezidentsiiasyna shaqyrylǵan. Tramp teraktiden soń qozǵalys ókilderimen kelissózdi toqtatqanyn habarlady.
Sarapshylardyń pikirinshe, 11 qyrkúiek kúngi qaiǵyly oqiǵany eske alý qarsańynda aýǵan tálipteriniń AQSh-qa kelýi rezonans týdyrýshy edi.
CNN telearnasynyń áskeri sarapshysy Djon Kerbidiń oiynsha, AQSh prezidentimen kezdesý "Talibanǵa" qyzmetin "zańdastyrýǵa" kómektesedi jáne qozǵalys úshin bul iri saiasi jeńis bolýshy edi. Sarapshy bul oqiǵa sonymen birge aýǵan úkimetiniń legitimdigine nuqsan keltiredi dep boljaǵan.
