AQSh prezidenti Donald Tramp Armeniia men Ázerbaijandy 26 qazannan bastap kúshine enetin atysty toqtatý rejimi týraly kelisimge qol jetkizýimen quttyqtady, dep habarlaidy "Ult aqparat" Tramptyń Twitter-degi resmi akkaýntyna silteme jasap.
«Armeniia premer-ministri Nikol Pashinian men Ázerbaijan prezidenti Ilham Álievti búgin túnde kúshine enetin atysty toqtatý rejimin saqtaýǵa keliskenderi úshin quttyqtaimyn. Kóptegen adamnyń ómiri qutqaryldy. Kelisim jasaǵany úshin ózimniń komandamdy, atap aitsam memlekettik hatshy Maikl Pampeony, Stiven Bigendi jáne Aq úi janyndaǵy Ulttyq qaýipsizdik keńesin maqtan etemin!» – delingen Tramptyń Twitter-degi habarlamasynda.
Aita keteiik, AQSh-tyń Memlekettik departamenti AQSh, Armeniia jáne Ázerbaijan biligi atysty toqtatý týraly kelisimge qol jetkizgeni týraly birlesken málimdeme taratqan bolatyn. Málimdemede AQSh, Armeniia jáne Ázerbaijan ókilderi 10 qazanda Máskeýde kelisilgen gýmanitarlyq atysty toqtatý rejimin oryndaýǵa jáne saqtaýǵa daiyn ekendikteri rastalǵany aitylǵan. Atysty toqtatý dúisenbi, 26 qazan, jergilikti ýaqyt boiynsha tańǵy saǵat 8-de kúshine enedi.
