QR Parlamenti Senatynyń Tóraǵasy Máýlen Áshimbaev barsha qazaqstandyqty Ulttyq dombyra kúnimen quttyqtady, dep habarlaidy "Ult aqparat".
«Barshańyzdy Ulttyq dombyra kúnimen quttyqtaimyn! Dombyra – ultymyzdyń úni, kúmbirine halqymyzdyń tarih dastanyn, qýanyshy men muńyn, erligi men erkindigin túgel syidyryp turǵan qasietti aspap. Sol sebepti dombyra ulttyq brendimiz ǵana emes, ulttyq bolmysymyz dep senimdi túrde aita alamyz. Tól mýzykamyzdyń jahandyq biikke kóterilýinde de dombyranyń orny erekshe. Oǵan Qurmanǵazy men Táttimbetten, Súgir men Dinadan qalǵan kúiler dálel. Jyraýlardyń jyr-termeleri men sal-serilerdiń áýezdi ánderi de dombyra arqyly túrlene tústi», - dep jazdy Senat spikeri Facebook paraqshasynda.
Sonymen qatar Senat Tóraǵasy qazirgi tańda qasietti aspaptyń qadirin arttyrý arqyly ulttyq kodymyzdy jańǵyrtý – bárimizdiń abyroily mindetimiz ekendigine basa nazar aýdartady.
«Elbasymyzdyń Ulttyq dombyra kúnin belgileýdegi basty maqsaty da osy ekeni anyq. Sonyń aiasynda sońǵy kezderi dombyraǵa, jalpy ulttyq ónerge degen qyzyǵýshylyq erekshe sipatqa ie bolǵany anyq baiqalady. Sondyqtan aldaǵy ýaqytta dombyranyń qadir-qasieti burynǵydan da arta túsetinine eshqandai kúmán joq. Endeshe tól qundylyǵymyzdy tórge ozdyratyn mereke qutty bolsyn! Qasterli dombyramyzdyń úni aspandai bersin!», - dedi Máýlen Áshimbaev.
