Foto: Instagram/amanzhol_altai
Májilis depýtaty Amanjol Áltai Úkimetten dombyraǵa qarsy shabýyldardy toqtatýdy talap etti, dep habarlaidy Sputnik Qazaqstan.
Áltaidyń aitýynsha, búginde dombyraǵa qarsy shabýyldar, jas urpaqtyń sanasyn teris uǵymdarǵa itermeleitin qaýipti de, ulttyq dúnietanymymyzǵa jat pikirler kóbeiip barady.
"Ásirese, dini jat aǵymdardyń jeteginde ketken keibir Qazaqstan azamattary jurtty adastyratyn teris pikirler taratýda. Buǵan áleýmettik jelide jeldei esip júrgen "Dombyra – haram" degen sekildi adam shoshytar alyp-qashpa sózder dálel. Dombyra – tatýlyq pen birliktiń mámilegeri. Ata tarihymyzdaǵy nebir alasapyran zamandarda ultty uiystyrýǵa, eldi biriktirýge, erlerdi el qorǵaýǵa shaqyrýǵa zor ról atqarǵan", - dedi Áltai Májilistiń búgingi otyrysynda.
Depýtat ata-babalarymyz bileginen ál ketip, ózegi talyp, aqtyq demi shyqqansha qolynan dombyrasyn tastamaǵan.
"Endeshe, dombyraǵa tiisý – ultqa til tigizý, tóltýma mádenietimizdi qorlaý, ótken tarihymyz ben búginimizge kóleńke túsirý dep qabyldaimyz. Konstitýtsiiamyzdyń 14-babynda naqty kórsetilgendei, qazaq halqynyń ulttyq qundylyǵy men ereksheligine til tigizýge eshkimniń de quqy joq", - dep atap ótti depýtat.
Osy oraida Áltai birqatar sharany atqarý qajettigin talap etti. Olar:
Bilim beretin orta mektepterde án-kúi sabaǵynda dombyra aspabyn úiretý oqý baǵdarlamasyna engizý;
Buqaralyq aqparat quraldarynda, radio jáne telearnalarda dombyra aspabynyń qundylyǵyn ashatyn án-kúi, jyr-terme, aitys ónerlerin kóbirek nasihattaý;
Din isteri jónindegi basqarma teris aǵym jeteginde ketken adamdarmen jumys júrgizýdi kúsheitýge tiis.
