Ońtústik Qazaqstan oblysy Báidibek aýdanyndaǵy «Domalaq ana» kesenesi janynan jańa qonaq úi kesheni paidalanýǵa berildi, dep habarlaidy "Ult aqparat" ákimniń baspasóz qyzmetine silteme jasap.
Nysannyń ashylý saltanatyna oblys ákimi Janseiit Túimebaev arnaiy qatysyp, lentasyn qidy. Saltanatty sharaǵa belgili memleket jáne qoǵam qairatkerleri, ziialy qaýym ókilderi qatysty.
«Elbasymyzdyń «Bolashaqqa baǵdar: rýhani jańǵyrý» maqalasynda Qazaqstannyń kieli jerleriniń kartasyn ázirleý tapsyrylǵan bolatyn. Atalǵan joba aiasynda óńirimizdegi birqatar qasietti jerlerdi jańǵyrtý, qaita qalpyna keltirý sharalary qolǵa alyndy. Solardyń biri - «Domalaq ana» kesenesi búgin qaita jańǵyryp, kelýshilerge jańa qonaq úi keshenin usynyp otyr. Jalpy qazaq halqy úshin Domalaq ananyń orny bólek. Endeshe, jańa keshen, keseneniń jańǵyrýy qutty bolsyn!», - dedi Janseiit Qanseiituly.
Ana rýhyn qurmetteitin janashyr azamattardyń demeýshiligimen boi kótergen keshende ziiarat etýshilerge barlyq jaǵdai jasalǵan. Onda qonaqtarǵa arnalǵan jatyn bólmeler, ashana, kiiz úi pishindes oryndyqtar men ózge de turmystyq ǵimarattar bar. Qonaq úidi aralap kórgen óńir basshysy aldaǵy ýaqytta «Domalaq ana» kesenesine ziiarat etýshilerdiń qatary arta túsetinine senim bildirdi.
Aita keteiik, Qazaqstannyń kieli jerleriniń kartasy jobasy aiasynda OQO-da 104 kieli orynnyń tizimi jasaqtalǵan bolatyn. Onyń 17-i respýblikalyq mańyzy bar tizimge engizilgen. «Domalaq ana» kesenesi solardyń biri jáne biregeii sanalady. Kesene Qarataýdyń kúngei betinde, Balabógen ózeniniń ańǵarynda ornalasqan. Domalaq ana, iaǵni Nurila Áli Symanqyzy - halqymyzdyń abyz analarynyń biri sanalady. 1456 jyly Domalaq ananyń nemeresi Dýlat Buharadan Abdýlla Sheri esimdi ustany aldyrtyp, alǵash ret kesene turǵyzǵan. Odan keiin kesene birneshe ret buzylyp, qaita jóndeýden ótti. Búginde eńsesi biik záýlim ǵimarat kúnnen kúnge kórkeiip keledi. Jańadan paidalanýǵa berilgen «Qonaq úi kesheni» bolashaqta osynda keletin týrister sanynyń artýyna erekshe serpin bermek.
Budan bólek, óńirimizde týrizm salasyn damytý maqsatynda tarihi oryndardy qalpyna keltirý úshin arnaiy baǵdarlama daiyndalyp, kezeń-kezeńimen iske asyrylyp keledi. Mysaly, aldaǵy ýaqytta Qazyǵurt, Ordabasy taýlaryn jáne ortaǵasyrlyq Otyrar, Saýran, Sairam, Sidaq, Mártóbe qalashyqtary men Jýantóbe, Qaraspan, Kúltóbe siiaqty ejelgi eldi mekenderdi qalpyna keltirý jumystary bastalmaq. Sonymen qatar, bolashaqta Sairam aýdanyndaǵy «Hanqorǵan» arheologiialyq qalashyǵy ashyq aspan astyndaǵy mýzeige ainalatyn bolady.
