Parlament Senaty Halyqaralyq qatynastar, qorǵanys jáne qaýipsizdik komiteti músheleriniń Ózbekstan Olii Májilisiniń Senaty Halyqaralyq qatynastar, syrtqy ekonomikalyq bailanystar, shetel investitsiialary jáne týrizm jónindegi komitetiniń depýtattarymen Saryaǵashtaǵy kezdesýiniń qorytyndylary boiynsha ázirlengen naqty usynystar Úkimetke jiberiletin boldy. Bul týraly Senat komitetiniń tóraiymy Dariǵa Nazarbaeva jýrnalisterge bergen suhbatynda atap ótti.
Qazaqstan men Ózbekstan senatorlary kedendik retteýdi jetildirý, taýar ainalymyn arttyrý jáne týrizm salasyndaǵy yntymaqtastyqty ulǵaitý týraly usynystar aitty.
– Ashyq ári aiqyn jáne dostyq shekarasyn qalyptastyrý kerek, sonda barlyq salalardaǵy qarym-qatynastar tereńdei túsedi , – dedi Dariǵa Nazarbaeva. –Ol úshin barlyq kedendik rásimderdi biryńǵailaý kerek. Aqparattandyrý salalary iske qosylmai, jedel damý múmkin emes. Qazirgi aqparattyq júieler bolmaiynsha shekarada baqylaý júzege aspaidy».
Senatorlar eki eldiń týristik áleýetin damytý máselesin de qarady. Qazaqstan men Ózbekstanda týrizmdi damytý ǵana emes, Ortalyq Aziianyń barlyq kórnekti jerlerin kórgisi keletin shetel týristeriniń bizdiń elderge kelýin yntalandyrý da mańyzdy, dep sanaidy D.Nazarbaeva. Ol aziialyq «Silkviza» shengenin qalyptastyrý týraly usynys aitty.
Parlamentshiler barlyq máselelerdi kezeń-kezeńmen sheshý úshin birlesken Jol kartasyn ázirleýge ýaǵdalasty. Senat komitetteriniń deńgeiinde ózara is-qimyldyń osyndai sipaty jalǵasatyn bolady.
Ózbekstan Olii Májilisi Senatynyń Halyqaralyq qatynastar, syrtqy ekonomikalyq bailanystar, shetel investitsiialary jáne týrizm komitetiniń tóraǵasy Álisher Qurmanov Ózbekstan men Qazaqstan arasynda sheshilmegen máselelerdiń joq ekenin atap ótti.
–Bul halyqtarymyzdy jaqyndatýdy kózdeitin bizdiń Prezidentterimizdiń nietterin parlamentshiler de, ministrlikter men mekemelerdiń ókilderi de tolyǵymen qoldaitynyn kórsetedi, – dedi ol.
Sharaǵa Qazaqstan Respýblikasy Ulttyq qaýipsizdik komiteti Shekara qyzmetiniń, Ishki ister ministrligi Kóshi-qon qyzmeti komitetiniń, aýyl sharýashylyǵy, qorǵanys jáne aeroǵaryshtyq ónerkásibi, mádeniet jáne sport ministrlikteriniń ókilderi qatysty.
