Almatyda Olimpiada chempiony Dmitrii Balandin kóliginiń ainasyn urlaǵan Aidos Ýálievtiń bas bostandyǵy 4 jylǵa shekteldi, dep habarlaidy QazAqparat.
№2 Almaly aýdandyq sotynyń sýdiasy Kámshat Sáýirova Aidos Ýálievti QR QK 188-baby boiynsha aiypty dep taýyp, 4 jylǵa bas bostandyǵyn shekteý týraly úkim shyǵardy.
«Sottalýshy Aidos Ýálievtiń aiyby tolyq dáleldendi dep sanaimyn. Alaida onyń buryn sottalmaǵanyn, qartaiǵan ata-anasynyń bar ekenin, is boiynsha shyǵynnyń joqtyǵy eskerildi. Sol sebepti sottalýshynyń 4 jylǵa bas bostandyǵy shektelsin. Sottalýshy sot zalynan bosatylsyn. Probatsiialyq baqylaý ornatylsyn», - dedi úkimdi oqyǵan sýdia.
Jábirlenýshiler belgili Olimpiada chempiony Dmitrii Balandin men Almaty turǵyny Raýanbek Qýanov. Sottalýshy ekeýiniń kóliginen ainalaryn urlap ketken.
Aldyńǵy sot otyrysynda sottalýshy jábirlenýshilerge keltirilgen materialdyq shyǵyndy tolyǵymen ótegen bolatyn.
Buǵan deiin prokýror ony 3 jylǵa bas bostandyǵynan aiyrýdy suraǵan bolatyn.
Eske sala keteiik, oqiǵa 1 sáýirde bolǵan. Qurmanǵazy men Baiseiitova kósheleriniń qiylysynda Olimpiada chempiony Dmitrii Balandinniń Toyota Land Cruiser kóliginiń ainasyn bireýler urlap ketken bolatyn.
Osydan bir jyl buryn sol jerde Denis Tenniń kóliginiń ainasyn urlaǵandar sportshyny pyshaqtap ketti, ol keiin aýrýhanada kóz jumdy.
