Elordanyń sáýlettik-estetikalyq kelbeti qalanyń dizain-kodynda jazylǵan. Bul týraly búgin Ortalyq kommýnikatsiialar qyzmetindegi baspasóz máslihatynda elorda ákimi Altai Kólginov aitty, dep habarlaidy QazAqparat.
Onyń aitýynsha, dizain-kod - stilistikalyq birtutas, jaily jáne qaýipsiz qalalyq ortany qalyptastyrý úshin birqatar ereje men usynystan quralǵan.
«Dizain-kod ǵimarattyń jáne kóshe-jol keńistiginiń qasbettik elementterine baǵyttalǵan. Ǵimarattyń qasbeti jaǵynan jol jelisiniń qoldanystaǵy jaǵdaiyn kishigirim sáýlettik nysandardy, kógaldandyrýdy, árleý materialdaryn paidalanýdy, tús shemalaryn jáne jarnamalyq qurylymdardyń ólshemderin eskere otyryp túzetý josparlanǵan. Sonymen qatar, dizain-kod erejesi qala keńistigin damytýdy retteidi. Dizain-kodtyń basty mindeti - qoǵamdyq keńistikti damytý jáne adamdar úshin yńǵaily qala qurý», - dedi A.Kólginov.
Sondai-aq kóshe keńistigin 4 synypqa jiktelgen. Olar: úzdiksiz qozǵalystyń qalalyq mańyzy bar negizgi kóshe, retteletin qozǵalys, aýdandyq mańyzy bar negizgi jáne jergilikti kóshe. Jol qozǵalysy men jaiaý júrginshilerdiń qozǵalysy naqty bólinbegenine bailanysty trotýarlarǵa kóp júkteme túsedi. Dizain-kodta jaiaý júrginshiler, velosiped alańdary, kóshe kafeleri, qoǵamdyq oryndar men kógaldandyrýdy naqty bólý qarastyrylǵan.
Ár aimaqtyń ózindik abattandyrý elementteri bar: abattandyrý, trotýar jáne alań jamylǵylary, jaryqtandyrý, kóshe jihazdary, aialdama pavilondary jáne basqalary.
Jarnamalyq nysandar men qondyrǵylardy, sondai-aq ǵimarattardyń qasbetterine konditsionerlerdi ornalastyrý erejeleri ázirlendi. Dizain-kod qalanyń kelbetin jaqsartyp, týristik tartymdylyqty arttyrady.
Eske sala ketsek, 12 jeltoqsanda elordanyń qalalyq máslihaty bas qalanyń dizain-kod jobasyn bekitken edi.
