«Bolashaq» korporativtik qory «Ózińnen basta» jobasy aiasynda qazaq tiline dýbliajdalǵan Disney kompaniiasynyń 5 jańa filminiń tusaýkeserin ótkizdi, dep habarlaidy QazAqparat tilshisi.
Aita keterligi, 2011 jyldan beri «Bolashaq» KQ men Meloman kompaniiasy 27 gollivýdtyq kinokartinanyń qazaq tilindegi dýbliajyn jasap shyǵarǵan. Qor direktory Dinara Shaijúnisovanyń aitýynsha, osy jyly kishkentai kórermender nazaryna qazaq tiline aýdarylǵan 5 filmniń tusaýkeseri daiyndalýda. Atap aitqanda, 28 naýryzda - «Dambo», 12 mamyrda - «Aladdin», 20 maýsymda - «Oiynshyqtar hikaiasy 4», 19 shildede - «Arystan patsha» jáne 28 qarashada - «Muzdy ólke 2» týyndylary kórermenge jol tartady.
«Biz álemdik stýdiianyń otbasymen kórýge arnalǵan qazaq tilindegi sapaly kontentin qoljetimdi etkimiz keledi. Osy maqsatta otandyq ártistermen belsendi qarym-qatynas ornatyp, alǵashqy kastingterge 10-nan astam tanymal akter synaqtan ótýge shaqyrtyldy. Basty rólderdi somdaityn akterlerdi Disnei kompaniiasy bekitetindikten, bizdiń otandyq akterler úshin atalǵan jobaǵa qatysý kásibi ósýdiń nyshany bolyp otyr. Osy oraida aldaǵy kastingterde de Qazaqstannyń tanymal tulǵalary jobaǵa qoldaý kórsetip, birlesken jumystyń arqasynda kinoteatr zaldary qazaqstandyq otbasylarǵa toly bolady dep senemiz», - dedi «Bolashaq» KQ direktory Dinara Shaijúnisova OKQ-da ótken baspasóz máslihatynda.
Al Disney filmindegi basty keiipkerdi dýbliajdaýshy akter Dáýren Serǵazinniń aitýyna qaraǵanda, álemge taralǵan týyndylardy qazaq tiline aýdarý jumysyna qazaq teatry men kinematografiiasynyń barsha akter qaýymy qyzyǵýshylyq tanytyp otyr.
Jobany uiymdastyrýshylar qazaq tilinde dýbliajdalǵan týyndylardy halyqqa keńinen tanytý maqsatynda ivi.ru onlain-kinoteatrymen birlesip, aýqymdy qaiyrymdylyq kinofestivalin ótkizýdi josparlap otyr. Jaz mezgiliniń basynda qor dýbliajdaǵan filmder birneshe kún Almaty turǵyndary úshin ashyq aspan astynda kórsetiletin bolady.
Belgili bolǵandai, 2019 jyldyń kóktemi rejisser Tim Berton fantastika stilinde túsirgen «Dambo» otbasylyq kinofilminen bastalady. 1941 jylǵy tanymal mýltfilmniń remeiki úlken qulaǵy bar kishkentai pildiń janýarlardyń qorlyǵy men mazaǵynan sharshap, ushýdy úirengen oqiǵasyn baiandaidy. Film 2019 jyldyń 28 naýryzynda dýbliaj demeýshisi - BI Group qoldaýymen ótedi.
