Búgin Senattaǵy Qazaqstannyń agroónerkásiptik keshenin damytýdyń 2017-2021 jyldarǵa arnalǵan memlekettik baǵdarlamasyn iske asyrý taqyrybyndaǵy Úkimet saǵatynda QR Ulttyq ekonomika vitse-ministri Álibek Qýantyrov «Diplommen aýylǵa» jobasy boiynsha qansha qarajat bólinetinin aitty, dep habarlaidy "Ult aqparat".
«Ulttyq ekonomika ministrligi tarapynan aýyldyq jerlerdi damytýǵa baǵyttalǵan «Diplommen aýylǵa» jáne «Aýyl el besigi» jobalary iske asyrylýda. «Diplommen aýylǵa» jobasynyń basty maqsaty - densaýlyqty saqtaý, bilim berý, áleýmettik qamsyzdandyrý, mádeniet, sport jáne agroónerkásiptik keshen salasyndaǵy aýyldyq eldi mekenderde jumys isteý jáne turý úshin kelgen aýyldardyń, aýyldyq okrýgterdegi memlekettik qyzmetshilerdi áleýmettik qoldaý sharalaryn usyný arqyly diplomdary bar mamandardy tirkeý jáne yntalandyrý. Joba aiasynda 100 AEK mólsherindegi bir rettik kóterme járdemaqy retinde áleýmettik qoldaý jáne turǵyn úige 1500 AEK-ten aspaityn biýdjettik nesie túrindegi jańa qoldaý sharalary qarastyrylǵan», - dedi Álibek Qýantyrov.
Onyń aitýynsha, jobany iske asyrý kezeńinde (2009 jyldan 2020 jylǵa deiin) 77 myńnan astam maman 19,5 mlrd teńge somasynda kóterme járdemaqy aldy, al 36 myńnan astam maman 105,3 mlrd teńge kóleminde turǵyn úi satyp alýǵa biýdjettik nesie aldy.
«2021 jylǵa 4,5 myń mamanǵa 20 mlrd teńgege turǵyn úi satyp alýǵa biýdjettik nesie berý jáne jalpy somasy 2,3 mlrd teńgege 8 myń mamanǵa kóterme járdemaqy berý josparlanǵan. Sonymen birge, 2021-2025 jyldar aralyǵynda «Nur Otan» partiiasynyń sailaýaldy baǵdarlamasynyń jol kartasyn iske asyrý aiasynda jobany 110 mlrd teńge somasyna qarjylandyrý josparlanyp otyr», - dedi vitse-ministr.
