«Diplommen aýylǵa» baǵdarlamasyna memlekettik qyzmetshiler qosylady. Bul jaiynda QR Premer-Ministri Asqar Maminniń Májilis depýtatynyń saýalyna bergen jaýabynda aitylǵan, dep habarlaidy "Ult aqparat".
Atap ótilgendei, QR Tuńǵysh Prezidenti Nursultan Nazarbaev 2007 jyldyń 5 naýryzynda ótken agroónerkásip kesheni máseleri jónindegi respýblikalyq keńeste aýylǵa oralǵan mamandardy áleýmettik qoldaý sharalaryn usyný arqyly yntalandyrýdy tapsyrdy. «Diplommen aýylǵa» baǵdarlamasy naqty aýyldyq eldi mekenge jumys isteýge jáne turýǵa kelgen mamandardy qoldaýǵa baǵyttalǵan.
«Atalǵan tapsyrmaǵa aýyldyq jerlerde áleýmettik salalardaǵy bilikti mamandardyń kadr tapshylyǵy, soǵan orai bilim berý, meditsinalyq jáne basqa da áleýmettik qyzmetterdiń sapasyna qanaǵattanbaýshylyq, qala men aýyl arasyndaǵy oryn alyp otyrǵan úilesimsizdik negiz boldy», - dedi Premer-Ministr.
Asqar Maminniń aitýynsha, joba aiasynda usynylatyn áleýmettik qoldaý sharalary «Agroónerkásip keshenin jáne aýyldyq aýmaqtardy damytýdy memlekettik retteý týraly» QR zańynyń 18-baby 8-tarmaǵymen reglamenttelgen. Atalǵan bap tek aýyldyq aýmaqtardy damytýǵa baǵyttalǵan jáne qalalyq eldi mekenderge qoldanylmaidy.
«Buǵan qosa, aýdandyq mańyzy bar qalaǵa kelgen mamandar úshin joba aiasynda áleýmettik qoldaý sharalaryn usyný aýyldyq jerlerden mamandardyń ketýine jáne kadr tapshylyǵyn odan ary ulǵaiýyna, sondai-aq biýdjet shyǵystarynyń artýyna túrtki bolady. Degenmen, «Diplommen aýylǵa» jobasyna aýyldyq okrýg ákimdiginiń apparatynda jumys isteitin memlekettik qyzmetshilerdi qosý josparlanǵan. Bul da memlekettik biýdjettiń shyǵys bóligin arttyrady. Bul norma QR Úkimetiniń 2019 jylǵy 30 jeltoqsandaǵy №1012 qaýlysymen QR Parlamenti Májilisiniń qaraýyna engizilgen «Memlekettik qyzmet máseleleri boiynsha Qazaqstan Respýblikasynyń keibir zańnamalyq aktilerine ózgertýler men tolyqtyrýlar engizý týraly» zań jobasynda kózdelgen», - dedi Úkimet basshysy.
