Aýyldy jerge jumys isteýge barǵan mamandardyń turǵyn úi satyp nemese salyp alýyna biýdjettik nesie berý - «Diplommen aýylǵa» baǵdarlamasy aiasyndaǵy memlekettik qoldaý sharalarynyń biri, dep habarlaidy "Ult aqparat".
Aýyl sharýashylyǵyn qarjylai qoldaý qory «Diplommen aýylǵa» baǵdarlamasyn iske asyrýdaǵy senimdi agent retinde qyzmet atqarady. Qor 2010 jyldan beri aýyldy jerge jumysqa barǵan 35 myńnan astam mamannyń baspanaly bolýyna nesie berdi.
1500 AEK somasyndaǵy nesie 0,01 %-ben 15 jylǵa beriledi. Bul baǵdarlama jas mamandar arasynda úlken suranysqa ie.
Biýdjettik nesie buryn densaýlyq saqtaý, bilim berý, áleýmettik qamtamasyz etý, mádeniet, sport jáne agroónerkásip kesheni salasynyń mamandaryna ǵana berilip kelgen bolatyn.
Biyldan bastap bul tizimge aýyl, kent, aýyldyq okrýg ákimi apparatynyń memlekettik qyzmetkerleri de kirip otyr.
Bul ózgeris QR Ekonomika ministrliginiń buiryǵymen engizilip, biyl qyrkúiek aiynan beri iske asyrylýda.
Nesieniń qoljetimdiligin arttyrý úshin qujat jinaýdy jeńildetetin birqatar is-shara qabyldandy.
Máselen, Aýyl sharýashylyǵyn qarjylai qoldaý qorynyń «elektrondyq úkimet» portalymen jáne memlekettik derekter bazasymen biriktirilgen ózara is-qimylynyń nátijesinde birqatar qujat elektrondy túrde suratylatyn boldy.
Onyń ishinde jeke basyn kýálandyratyn qujat, turǵylyqty tirkelgen jeri týraly, neke týraly, jyljymaityn múlkiniń bolýy nemese bolmaýy jóninde jáne sońǵy jumys orny týraly málimetter bar.
Jumysqa nemese baǵdarlamaǵa qatysýǵa múddeli diplomy bar mamandar aýdan ákimdikteriniń saittaryndaǵy bos jumys oryndary týraly málimetterdi ala alady.
Tilektes Qosmuratova – «Diplommen aýylǵa» jobasynyń qatysýshysy. Jaqynda ǵana baǵdarlama arqyly baspanaǵa qol jetkizdi.
Tilektes Saryaǵash aýdanynyń týmasy. 2015 jyly Shymkenttiń joǵary oqý ornyn támámdap, turmysqa shyqqan. Qazyǵurt aýdanynyń Qosaǵash aýylyna kóship barǵan ol mektepke aǵylshyn tili muǵalimi bolyp ornalasty.
Jergilikti gazetten jas mamandarǵa memleket qoldaý kórsetetinin oqyp, ákimdikke barǵan. Úsh balasy bar Tilektes «Diplommen aýylǵa» baǵdarlamasy arqyly nesie rásimdep, úi satyp aldy.
Muǵalimniń eńbekaqysy alǵan nesiesin tólep turýǵa jetkilikti. Kúieýi kásipkerlikpen ainalysady. Sondyqtan, nesieni tóleý olarǵa qiyndyq týdyrmaidy.
«Bul óte jaqsy baǵdarlama. Ár aidyń basynda 20 700 teńge ǵana tóleimiz. Alǵashqy tólemdi tólep te úlgerdik. Endi mobildik qosymsha arqyly-aq tólei salýǵa bolatynyn bildim. Bul – otbasymyz úshin óz baspanamyzǵa qol jetkizip, aiaǵymyzdan nyq turyp ketýimizge taptyrmas múmkindik boldy», - deidi jas muǵalim.
Aýyldarǵa baryp jumys isteýge nietti mamandarǵa nesie berý baǵdarlamasy elimizdiń barlyq oblysynda júrip jatyr. Tolyq aqparatty jergilikti ákimdikterden bilýge bolady.
Búgingi tańda 4 524 mamanǵa turǵyn úi nesiesin rásimdegen Aýyl sharýashylyǵyn qarjylai qoldaý qorynyń Qyzylorda filialy kósh bastap keledi.
4 006 mamannyń baspanaly bolýyna septigi tigen Almaty filialy ekinshi orynda. 3 768 mamanǵa turǵyn úi nesiesin bergen Batys Qazaqstan filialy úzdik úshtikti túiindedi.
