Diplom satýǵa tiym salý bilim sapasyn arttyrýǵa yqpal etedi. Mundai pikirdi Tselinograd aýdanynyń qurmetti azamaty, qoǵam qairatkeri Sádibek Túgel aitty, dep habarlaidy QazAqparat.
«Memleket basshysynyń Qazaqstan halqyna Joldaýyn tyńdap, onda ustaz bedelin arttyrýǵa yqpal etetin tyń bastamalardy estip, taǵy bir marqaiyp qaldyq. Prezident az qamtylǵan jáne kópbalaly otbasylardy qoldaý úshin Úkimetke Daryndy balanyń qabiletin damytýdyń «Jol kartasyn» ázirleýi qajettigin alǵa tartty.
Sonymen qatar Úkimet pen ákimder daryndy balalardyń úiirmeler men ortalyqtarǵa, jazǵy lagerlerge barýy úshin múmkindik jasaýy kerektigin eskertip ótti. Joldaýda joǵary bilimniń sapasy jaily ózimizdiń túlekterdi jumyspen qamtý jaǵynan elimizdegi joǵary oqý oryndarynyń jartysy ǵana 60 paiyzdyq deńgeige qol jetkizip otyrǵandyǵyna toqtala kelip, olardyń sanyn qysqartý máselesin qaraý kerektigin jetkizdi.
Ásirese, tereń bilim berýdiń ornyna diplom satýmen ainalysqan ýniversitetterimiz bar ekenin basa aitty. Bul turǵyda osyndai oqý oryndaryna tyiym salý arqyly bilim berý sapasyn arttyrý qajettigin aitty», - dedi ol QR Prezidenti Qasym-Jomart Toqaevtyń biylǵy Joldaýyna orai pikir bildire kele.
Sonymen qatar, ol Joldaýda bilim salasy jaily ózekti bir másele – qarjylandyrýdyń birkelki bolmaýy jáne bilim bólimderin basqarý jáne biýdjet qarjysyn ákimshilendirý fýnktsiialaryn aýdandyq deńgeiden oblystyq deńgeige berý, derbes qarjylandyrý tártibin engizý, oqýlyq sapasy men ustazdar jalaqysyn arttyrýǵa nazar aýdarylýy halyqtyń kóńilinen shyqqanyn aitty.
«Bul Joldaýdaǵy bilim salasyna qatysty eń qajetti másele - oqýlyq sapasynyń tómendigi týraly boldy. Bul jóninde Memleket basshysy oqýshylardy sapaly oqýlyqtarmen qamtamasyz etý – tiisti ministrliktiń tikelei mindeti ekendigin aitty. Joldaýdaǵy ustazdar qaýymyna qatysty qýanyshty jańalyq muǵalimder men oqytýshylardyń áleýmettik jaǵdaiyn jaqsartýmen balanysty boldy. Tamyz konferentsiiasynda Memleket basshysy aldaǵy tórt jyl ishinde muǵalimderdiń eńbek aqysyn eki ese arttyrýdy tapsyrǵan bolatyn. Aldaǵy jyldan bastap ustazdardyń jalaqysy 25 paiyzǵa ósetini ustazdar qaýymyn bir serpiltip tastady.
Osylaisha, Memleket basshysynyń Joldaýy bilimniń ózekti máselelerin qozǵaýymen kóńilimizden shyqty. Bul jolǵy Joldaý oqytýdyń ózekti máseleleriniń sheshilýi men ustaz bedeliniń artýyna yqpal eterine kámil senemiz», - dep túiindedi Sádibek Túgel.
