Parij qalasynda satylymǵa shyǵarylǵan allozavrdyń qańqasy 3 million eýroǵa (shamamen 1,5 mlrd teńge) satyldy. Bul Drýo saýda úiinde qoiylǵan lottyń alǵashqy baǵasynan eki ese kóp, dep habarlaidy Euronews.
Súieginiń 70 paiyzdaiy saqtalǵan qańqanyń biiktigi úsh metrden asady, uzyndyǵy shamamen 10 metr. Dinozavr qańqasynyń jasy 150 million jyl. Eń iri jyrtqyshtyń biriniń qańqasyn satyp alǵan adamnyń esimi atalmaidy. Antikvariat sarapshylar sońǵy ýaqytta dinozavr súiekterine erekshe qyzyǵýshylyq týyp otyrǵanyn aitady.
«Osyndai zatty satyp alýǵa qyzyǵýshylyq tanytqan jekemenshik murajailar az emes, sebebi bul óte qyzyqty ári sirek eksponattar. Ol úilerinde osyndai qańqany saqtap júrýge qumar jekemenshik satyp alýshylardy da qyzyqtyryp otyr», - dep atap ótti bássaýdashy Aleksandr Jikello.
Dinozavrǵa qyzyǵatyndardyń kóp ekenin ótken aptada Niý-Iorktegi Christie's bássaýdasynda ornatylǵan rekordtan da kórýge bolady. Telefon arqyly ótken saýda kezinde Ońtústik Dakotadaǵy Blek Hills geologiialyq zertteý institýtynda saqtalyp kelgen Sten esimdi tirannozavr 32 million dollarǵa satylyp ketti.
