Din adam quqyqtaryn qurmetteý úshin kúresýdiń qýatty quraly bolyp sanalady. Bul týraly BUU Bas hatshysynyń orynbasary Migel Anhel Martines Nur-Sultanda Álemdik jáne dástúrli dinder kóshbasshylarynyń VII sezinde aitty, dep habarlaidy QazAqparat.
«Bul bastamanyń Qazaqstanda týýy kezdeisoq emes. Qazaqstanda júzden astam ult pen kóptegen dini birlestikter tatý turyp jatyr. Adamzat qazir ekinshi dúniejúzilik soǵystan keiingi tarihtyń óte mańyzdy kezeńinde tur. Biz barlyq dinderdiń kúsh-jigerin biriktirýimiz kerek jáne dini alýantúrlilik álsizdik emes, kúsh ekenin túsinýimiz kerek», - deidi Migel Anhel Martines.
Sonymen birge BUU Bas hatshysynyń orynbasary ár mádeniet pen ár dindi qurmetteý qajettigin aitty.
«Diskriminatsiia bárimizdiń quqyǵymyzdy buzady, bul árqaisymyzdyń tolyq áleýetimizdi ashýǵa múmkindik bermeidi. Din adam quqyqtaryn qurmetteý úshin kúresýdiń qýatty quraly bolyp sanalady. Qazirgi ýaqytta BUU Órkenietter aliansy aitarlyqtai qiyn jaǵdaida. Geosaiasi landshafttaǵy eleýli ózgerister, ýnipoliarlyq tendentsiiasy, dini jáne etikalyq sipattamalar boiynsha bólinister Batys pen basqa álem arasyndaǵy alshaqtyqqa ákep soǵýda. Órkenietter aliansy álemniń túrli bólikteri arasynda kópirler salýǵa tyrysady. Qazaqstan búkil álemde kelisim men beibitshilikti qamtamasyz etý úshin osy jumystyń jáne osy bastamanyń óte mańyzdy bóligi bola alady», - dedi ol.
