Qazaqstan Respýblikasy Úkimetiniń 2020 jylǵy 5 aqpandaǵy Qaýlysymen Sheglova Dinara Rinatqyzy QR indýstriia jáne infraqurylymdyq damý vitse-ministri qyzmetine taǵaiyndaldy, dep jazady primeminister.kz.
Dinara Sheglova 1982 jyly Semei qalasynda týǵan. 2004 jyly Gýmilev atyndaǵy Eýraziia ulttyq ýniversitetin «halyqaralyq quqyq» mamandyǵy boiynsha, al 2007 jyly Qazaq ekonomika, qarjy jáne halyqaralyq saýda ýniversitetin «menedjment» mamandyǵy boiynsha, 2011 jyly Qazaq ekonomika, qarjy jáne halyqaralyq saýda ýniversitetin «aqparattyq júieler» mamandyǵy boiynsha bitirgen.
2004-2006 jyldary Qazaqstan Respýblikasy Aqparat jáne bailanys agenttiginiń jobalardy basqarý bóliminiń bas mamany bolyp jumys istedi.
Túrli jyldary kommertsiialyq salalarda eńbek etti.
2011 jyldan bastap «Zerde» ulttyq infokommýnikatsiialyq holdingi» AQ-ynda Infraqurylymdyq jobalar monitoringi departamentiniń bas menedjeri qyzmetinde istei bastady, keiinnen Servistik aqparattandyrý modeli departamentiniń direktory laýazymyna aýystyryldy. 2017 jyly «Zerde» ulttyq infokommýnikatsiialyq holdingi» AQ basqarýshy direktory qyzmetine taǵaiyndaldy, keiinnen holdingtiń basqarma tóraǵasynyń orynbasary laýazymyn atqardy.
2018-2019 jyldary Qazaqstan Respýblikasy aqparat jáne kommýnikatsiialar vitse-ministri bolyp eńbek etti.
2019 jyldan qazirge deiin Qazaqstan Respýblikasy Premer-Ministriniń keńesshisi qyzmetin atqardy.
