Qazaqstannyń jetekshi infektsionist dárigeri, meditsina ǵylymdarynyń doktory Dinagúl Baesheva Qazaqstannyń COVID-2019 aýrýymen júrgizip jatqan kúresine baǵa berdi, dep habarlaidy QazAqparat.
«Qandai másele týyndamasyn – biz salystyrmaly túrde qaraimyz. Basqa elderge qaraǵanda Qazaqstandaǵy kórsetkish áldeqaida jaqsy. Birinshiden Úkimetten bastap qarapaiym azamattarǵa deiin bul iske atsalysty. Bul –jumyla istegen jumystyń nátijesi. Aldyn alý sharalary qabyldandy. Bir-eki kúndi utqannyń arqasynda bul virýstyń tizgindei aldyq. Dárigerler men epidemiologter, Densaýlyq saqtaý ministrligi koronavirýstyń keń taralýyn toqtatty», - dedi meditsina ǵylymdarynyń doktory Densaýlyq saqtaý ministrliginiń Facebook-tegi paraqshasyndaǵy suhbat barysynda.
Karantin tártibi qazaqstandyqtarǵa neni úiretti? Bul suraqqa jaýap bergen Dinagúl Baesheva Qazaqstan táýelsiz memleket bolǵaly mundai indetpen birinshi ret betpe-bet kelgenin eske saldy. Onyń aitýynsha koronavirýstyń ishine birneshe shtamm kiredi. Mysaly Ońtústik Koreia, Qytai, Singapýr elderinde 2000 jyldardan beri ártúrli shtamdary kezdesken.
«Sodan beri koronavirýstyń bul shtamdarynan qanshama adam qaitys bolyp ketti. Sondyqtan ondaǵy adamdar indetke tez úirenip alǵan. Pandemiia bastaldy degen kezde jyldam oqshaýlanyp, qorǵanys shekteýlerin ustana bildi. Bizdiń el de osyndai sharalardy qoldana bilgenin atap ótý kerek. Qazaqstanda koronavirýs tirkelmei jatyp, aqparattyq túsindirý jumystary óte jiti júrgizildi. Halyq bildi. Kóbi qorǵanys sharalaryn qabyldap, qazir de betperde taǵyp, bir-birine asa jaqyndai qoimaidy. Halyqtyń durys kózqarasy qalyptasty. Osynyń báriniń arqasynda koronavirýstyń kóz jumǵan adamdardyń sany basqa elderge qaraǵanda tómendeý bolyp otyr», - dedi ol.
Qazaqstannyń jetekshi infektsionist dárigeri keibir adamdardyń «koronavirýsty jalǵan» dep senbegenin de aityp ótti.
«Koronavirýstan osy ýaqytqa deiin kóz jumǵan adamdardyń keibiri toiǵa baryp, júrip qalǵan. Artynsha ol adamdar birtalai kisige juqtyrdy. Qazir de ondai jaǵdai bar. Shetelden kelip jatqan azamattar da az emes. Keibiri qaýipsizdik sharalaryn qabyldady. Keibir jaǵdaida múldem basqasha, máselen Qyzylordada azamattardyń biri Máskeýden ushyp kelip, erteńinde úiine qonaq shaqyryp bárine virýs juqtyrǵan. Indetke qatysty adamdar ártúrli kózqarasta. Biraq bul infektsiia juqpaly ekenin, kópke ziianymyzdy tigizip alýymyz múmkin ekenine kózimiz jetip otyr», - dedi ol.
Dinagúl Baesheva aldaǵy ýaqytta gigiena saqtaý kerektigin eskertedi. Túshkirý men jótelýdiń mádenietin úirenip, maska taǵyp, qoldy jýyp, betti jii ustai bermeýdiń arqasynda koronavirýstan saqtana alatynymyzdy aitady.
