Esimi búkil álemge tanymal qazaq ánshisi Dimash Qudaibergen TIXR amerikalyq striming-platformasynda onlain kontsert berdi, dep habarlaidy "Ult aqparat".
DIMASH DIGITAL SHOW - Dimashtyń koronavirýs pandemiiasy bastalǵan sátten bergi alǵashqy jahandyq óner kórsetýi boldy. Atalǵan kontsertke daiyndyq júrip jatqany týraly ótken jyldyń jeltoqsan aiynyń basynda aityldy. Bul jaiynda ánshiniń ózi de áleýmettik jelide jii jazyp, súiikti juldyzdarynyń ónerin saǵynǵan jankúierler de únemi málimettermen bólisip otyrdy.
Kórsetilim aqyly boldy. Bilet satýdan túsken qarajattyń bir bóligin uiymdastyrýshylar qaiyrylymdylyqqa bermek.
«Dears, sizderge kontsert unady dep úmittenemin! Jeke ózim jáne meniń tobym sizderdiń alǵan áserlerińizdi bilýge daiyn!», - dep jazdy Dimash Qudaibergen Instagram-paraqshasynda.
Dimashtyń Eýraziialyq fanklýby usynǵan aqparatqa sáikes, ánshi 19 kompozitsiiadan turatyn baǵdarlama usyndy. Oǵan «Olimpico», «Give me your love», «S.O.S», «War and Peace», «Liýbov ýstavshih lebedei», «Mahabbat ber maǵan», «Qaraǵym-ai», «Qairan Elim», «Screaming» syndy ánder bar.
Sonymen qatar ol «Ómir óter» (R.Ǵaisin / T.Arynǵali), «Kieli meken» (E.Qudaibergen / Q.Aitbaev), «Be with me» (D.Qudaibergen / D.Arakelian, D.Shamýratov) syndy jańa ánderdi de tyńdarman nazaryna usyndy.
Dimashnews.com portalynyń jazýynsha, qazaq ánshisi 6 tilde, atap aitqanda qazaq, italian, frantsýz, qytai, aǵylshyn jáne orys tilderinde án saldy.
Onlain formatta ótken kontsert ánshiniń búkil álemdegi jankúierlerine úide otyryp-aq onyń ónerin tamashalaýǵa múmkindik berdi. DIMASH DIGITAL SHOW kontsertin álemniń 100-den astam elindegi jankúier kórdi.
«Meniń alǵashqy onlain kontsertimdi tamashalap, qoldaý kórsetken barlyǵyńyzǵa úlken alǵysymdy bildiremin. Pandemiia bizderdi uzaq ýaqyt ajyratqany óte ókinishti. Sondyqtan da búgin sizderdiń aldaryńyzǵa óner kórsetetindigime qýanyshtymyn. Sizderdi kórmesem de jan júregimmen maǵan únemi shabyt beretin, jańa biikterdi baǵyndyrýǵa qulshyndyratyn qoldaýlaryńyz ben energetikalaryńyzdy sezindim. Sizder búgingi shoýdan tolyqqandy lázzat aldyńyzdar dep oilaimyn. Taiaý arada sizdermen kezdesetindigime senimdimin», - dedi kontsert barysynda Dimash.
