Dimash Qudaibergenniń YouTube kanalynda «Be With Me» mýzykalyq beinebaianynyń premerasy ótti. Qyzyqty siýjet ánshiniń jańa qyryn kórsetti, dep habarlaidy dimashnews.com.
Ekshn janryndaǵy naǵyz shaǵyn film sekildi beinebaian Almatyda túsirilgen. Túsirilim bastalar aldynda ýkrainalyq rejisser Radislav Lýkin daiyndyq jumystarymen ainalysý úshin Qazaqstanǵa ushyp keldi.
Dimashpen birge beinebaian túsirý ideiasy burynyraq, «ARNAU» kontserttik týryna promo-beine túsirý kezinde paida boldy. Ártis Radislavqa «Be With Me» jańa tregin jibergen kezde, rejisser ánshiniń ishki álemin, energiiasy men oiynyń aýqymyn túsine otyryp, is júzinde birden bolashaq roliktiń tujyrymdamasyn oilap tapty.
– Dimash – ánderde ǵana emes, beinebaiandarda da óziniń ishki energiiasyn beretin ártis. Mysaly, kontsertter men túsirilimder týraly aitatyn bolsaq, Dimash shyǵarmashylyǵynyń barlyq jankúierleri onyń stadion tóbesiniń astynda ushýdy, qandai da bir qaýipti triýkterdi oryndaýdy unatatynyn biledi. Sondyqtan ekshn men tóbeles kórinisteri bolatyn janrlyq kino siiaqty túsirý ideiasy paida boldy. Sondai-aq, Dimashtyń akterlik sheberligi óte jaqsy damyǵanyn jáne ol ár túrli obrazdarǵa ene alatyndyǵyn atap ótken jón. Sondyqtan osy beinebaianda men ártisti kórermender úshin múlde basqa qyrynan jańa rólde kórsetkim keldi, – dep bólisti Radislav Lýkin.
Beineniń siýjeti kóptegen kórinisterdi tuspaldaidy. Beinebaian jelisin barynsha áserli qurý úshin túsirilim toby kóptegen oryndardy qaita qarastyryp, olardyń ishinen Almatynyń ártúrli jaqtaryndaǵy birneshe oryn tańdaldy.
Qoiýshy-operator Azamat Dýlatov Dimash úshin túsirgen barlyq beinebaiandardyń ishindegi eń qiyny osy bolǵanyn aitty. Komandanyń ár múshesi óte muqiiat tańdaldy.
– Beinebaiannyń túsirilimimen qatar Dimash mýzykamen belsendi ainalysýdy jalǵastyrdy. Iaǵni, ol túnde stýdiiada jańa material jazyp, sodan keiin demalmai, tóbeleske arnalǵan jattyǵýlarǵa baratyn. Ol osy jattyǵýlarda óte kóp kúsh jumsaǵandyqtan, biz ekshn kórinisterin tek 2-3 dýbl ǵana túsirdik», – dedi Radislav.
Beinebaiannyń triýkterin qazaqstandyq, sondai-aq sheteldiń kóptegen tanymal kinokartinalarymen jumys istegen Kazakh union kaskaderlik toby qoidy. Olar — «Neýderjimye 2», «Dnevnoi dozor», «Kóshpendiler», «Reketir» jáne taǵy da basqa kinokartinalarǵa qatysqan qas mamandar.
Kaskaderlik toptyń jetekshisi Baýyrjan Ábishev ekshn-kórinisteriniń jumysynan alǵan áserlerimen bólisti.
«Qiyn boldy dep aita almaimyn, óitkeni meniń osyndai kórinisterge arnalǵan triýkterdi jasaýda úlken tájiribem bar. Dimash sportqa daǵdylanǵan jigit, qoiylǵan mindetterdi tez meńgerdi, sondyqtan úsh-tórt kún ishinde biz qalaǵanymyzǵa qol jetkizdik. Beinebaianda jumys istegennen kóp áser aldym. Men kórermenderdiń pikirlerin asyǵa kútemin», – dedi ol.
