ديماش قۇدايبەرگەننٸڭ YouTube كانالىندا «Be With Me» مۋزىكالىق بەينەبايانىنىڭ پرەمەراسى ٶتتٸ. قىزىقتى سيۋجەت ەنشٸنٸڭ جاڭا قىرىن كٶرسەتتٸ, دەپ حابارلايدى dimashnews.com.
ەكشن جانرىنداعى ناعىز شاعىن فيلم سەكٸلدٸ بەينەبايان الماتىدا تٷسٸرٸلگەن. تٷسٸرٸلٸم باستالار الدىندا ۋكراينالىق رەجيسسەر راديسلاۆ لۋكين دايىندىق جۇمىستارىمەن اينالىسۋ ٷشٸن قازاقستانعا ۇشىپ كەلدٸ.
ديماشپەن بٸرگە بەينەبايان تٷسٸرۋ يدەياسى بۇرىنىراق, «ARNAU» كونتسەرتتٸك تۋرىنا پرومو-بەينە تٷسٸرۋ كەزٸندە پايدا بولدى. ەرتٸس راديسلاۆقا «Be With Me» جاڭا ترەگٸن جٸبەرگەن كەزدە, رەجيسسەر ەنشٸنٸڭ ٸشكٸ ەلەمٸن, ەنەرگيياسى مەن ويىنىڭ اۋقىمىن تٷسٸنە وتىرىپ, ٸس جٷزٸندە بٸردەن بولاشاق روليكتٸڭ تۇجىرىمداماسىن ويلاپ تاپتى.
– ديماش – ەندەردە عانا ەمەس, بەينەبايانداردا دا ٶزٸنٸڭ ٸشكٸ ەنەرگيياسىن بەرەتٸن ەرتٸس. مىسالى, كونتسەرتتەر مەن تٷسٸرٸلٸمدەر تۋرالى ايتاتىن بولساق, ديماش شىعارماشىلىعىنىڭ بارلىق جانكٷيەرلەرٸ ونىڭ ستاديون تٶبەسٸنٸڭ استىندا ۇشۋدى, قانداي دا بٸر قاۋٸپتٸ تريۋكتەردٸ ورىنداۋدى ۇناتاتىنىن بٸلەدٸ. سوندىقتان ەكشن مەن تٶبەلەس كٶرٸنٸستەرٸ بولاتىن جانرلىق كينو سيياقتى تٷسٸرۋ يدەياسى پايدا بولدى. سونداي-اق, ديماشتىڭ اكتەرلٸك شەبەرلٸگٸ ٶتە جاقسى دامىعانىن جەنە ول ەر تٷرلٸ وبرازدارعا ەنە الاتىندىعىن اتاپ ٶتكەن جٶن. سوندىقتان وسى بەينەباياندا مەن ەرتٸستٸ كٶرەرمەندەر ٷشٸن مٷلدە باسقا قىرىنان جاڭا رٶلدە كٶرسەتكٸم كەلدٸ, – دەپ بٶلٸستٸ راديسلاۆ لۋكين.
بەينەنٸڭ سيۋجەتٸ كٶپتەگەن كٶرٸنٸستەردٸ تۇسپالدايدى. بەينەبايان جەلٸسٸن بارىنشا ەسەرلٸ قۇرۋ ٷشٸن تٷسٸرٸلٸم توبى كٶپتەگەن ورىنداردى قايتا قاراستىرىپ, ولاردىڭ ٸشٸنەن الماتىنىڭ ەرتٷرلٸ جاقتارىنداعى بٸرنەشە ورىن تاڭدالدى.
قويۋشى-وپەراتور ازامات دۋلاتوۆ ديماش ٷشٸن تٷسٸرگەن بارلىق بەينەبايانداردىڭ ٸشٸندەگٸ ەڭ قيىنى وسى بولعانىن ايتتى. كوماندانىڭ ەر مٷشەسٸ ٶتە مۇقييات تاڭدالدى.
– بەينەباياننىڭ تٷسٸرٸلٸمٸمەن قاتار ديماش مۋزىكامەن بەلسەندٸ اينالىسۋدى جالعاستىردى. ياعني, ول تٷندە ستۋدييادا جاڭا ماتەريال جازىپ, سودان كەيٸن دەمالماي, تٶبەلەسكە ارنالعان جاتتىعۋلارعا باراتىن. ول وسى جاتتىعۋلاردا ٶتە كٶپ كٷش جۇمساعاندىقتان, بٸز ەكشن كٶرٸنٸستەرٸن تەك 2-3 دۋبل عانا تٷسٸردٸك», – دەدٸ راديسلاۆ.
بەينەباياننىڭ تريۋكتەرٸن قازاقستاندىق, سونداي-اق شەتەلدٸڭ كٶپتەگەن تانىمال كينوكارتينالارىمەن جۇمىس ٸستەگەن Kazakh union كاسكادەرلٸك توبى قويدى. ولار — «نەۋدەرجيمىە 2», «دنەۆنوي دوزور», «كٶشپەندٸلەر», «رەكەتير» جەنە تاعى دا باسقا كينوكارتينالارعا قاتىسقان قاس ماماندار.
كاسكادەرلٸك توپتىڭ جەتەكشٸسٸ باۋىرجان ەبٸشەۆ ەكشن-كٶرٸنٸستەرٸنٸڭ جۇمىسىنان العان ەسەرلەرٸمەن بٶلٸستٸ.
«قيىن بولدى دەپ ايتا المايمىن, ٶيتكەنٸ مەنٸڭ وسىنداي كٶرٸنٸستەرگە ارنالعان تريۋكتەردٸ جاساۋدا ٷلكەن تەجٸريبەم بار. ديماش سپورتقا داعدىلانعان جٸگٸت, قويىلعان مٸندەتتەردٸ تەز مەڭگەردٸ, سوندىقتان ٷش-تٶرت كٷن ٸشٸندە بٸز قالاعانىمىزعا قول جەتكٸزدٸك. بەينەباياندا جۇمىس ٸستەگەننەن كٶپ ەسەر الدىم. مەن كٶرەرمەندەردٸڭ پٸكٸرلەرٸن اسىعا كٷتەمٸن», – دەدٸ ول.
