Dimash Qudaibergenniń jazda elordada ótetin «Arnaý» atty jeke kontsertin sheteldik birneshe telearna kórsetetin bolady, dep habarlaidy QazAqparat tilshisi.
Eske sala ketsek, Dimash Qudaibergen AQSh-taǵy tanymal internet alańdardyń biri - Ranker-degi «The Best Singers of All Time» (Dáýirdiń uly ánshileri) daýys jinaý saiysyna qatysqanyn buǵan deiin habarlaǵan bolatynbyz. Ánshi atalmysh reitingte áý basta ekinshi orynǵa deiin kóterilgenimen, keiin júzdikten shyǵyp qalǵan edi.
OKQ-da ótken baspasóz máslihatynda Dimashqa atalmysh internet-saýalnamaǵa qatysty suraq qoiyldy.
«Sózdiń shyny kerek, internettegi daýys berý baiqaýyn oqyrmandarymnan estip bildim. Óitkeni, men ol kezde shetelde júrdim. Qyzý talqyǵa túsip jatqan ne daýys berý dep qarap edim, ishinde meni Maikl Djekson, Freddi Merkiýri sekildi álemdik juldyzdarmen qatar qoiypty. Bir jaǵynan, bul jaǵdai meni óte erekshe sezimge bóledi. Ondai kisilermen deńgeiles bolý úshin áli kóp ter tógip, aianbai eńbek etýim kerek. Osy oraida daýys berý kezinde qoldaǵan jerlesterime, sheteldegi tyńdarmandaryma shyn júrekten alǵys aitamyn. Biraq, ol eshqandai baiqaý nemese joba emes, internet júiesindegi kishigirim saýalnama ǵana bolatyn. Sizderdiń maǵan degen mahabbattaryńyz ben nietterińiz osyndaida kórindi. Úmitterińizdi aqtaý úshin barymdy salyp, janymdy salyp, talmai, tynbai eńbek ete beremin», - dedi Dimash Qudaibergen.
Baspasóz máslihaty barysynda «Qazaqstan» RTRK AQ tóraǵasy Erlan Qarin Astanada ótetin Dimashtyń kontsertine sheteldik telearnalar qazirdiń ózinde qyzyǵýshylyq tanytyp otyrǵanyn tilge tiek etti.
Sheteldik telearnalar men teleradiokorporatsiialar ártúrli suraýlar joldap jatyr. Astanada ótetin osynaý kontsert birneshe sheteldik telearna arqyly taralady. Sol sebepti, aýditoriia úlken. Uiymdastyrý jumysyn keń aýqymda júrgizgeli otyrmyz. Óz elinde, óz alańynda, myńdaǵan fanattarynyń aldynda ótetin Dimashtyń kontsertine orai qoldaýlaryńyzdy suraimyz», - dedi Erlan Qarin.
Eske sala ketsek, búgin OKQ-da ótken baspasóz máslihatynda Dimash Qudaibergen Jastar jyly aiasynda Astanada kontsert beretinin aitqan bolatyn.
