Mádeniet jáne sport ministri Aqtoty Raiymqulova ánshi Dimash Qudaibergenniń Niý-Iorktegi kontsertine daiyndyq qalai júrgizilip jatqanyn baian etti, dep habarlaidy QazAqparat.
«Dimash Qudaibergen – bizdiń Qazaqstannyń brendine ainalyp keledi. Qazirgi tańda ózderińiz biletindei, bizdiń ministrlik jas daryndardy barynsha qoldap keledi. Jas daryndar úshin respýblikalyq jáne halyqaralyq baiqaýlardy ótkizdik. Daryndy balalardy baiqaýlarǵa, sheberlik saǵattary men festivalderge jiberýge arnalǵan biýdjettik baǵdarlama da bar. Órenderimiz úmitti aqtap, aitýly biikterdi baǵyndyrýda», - dedi Aqtoty Raiymqulova Ortalyq kommýnikatsiialar qyzmeti alańynda ótken baspasóz máslihatynda.
Ministr Dimash Qudaibergen óziniń kásibi biigin baǵyndyrýda tózimdilik men eńbekqorlyqtyń eń úzdik úlgisi ekenin atap ótti.
«Álbette, ol qazaqstandyq ónerdi eń jetekshi ári álemdik deńgeide tanytyp júrgen óte daryndy jigit. Ózderińiz biletindei, Mádeniet jáne sport ministrliginiń qoldaýymen Dimashtyń kóntserti Nur-Sultanda, Londonda, Máskeýde ótkenin bilesizder. Biyl sondai kontsertti Niý-Iorkte ótkizýdi josparlap otyrmyz. Ol úshin ministrlik belsendi túrde kelissózderdi júrgizip jatyr. Birneshe zal usynyldy. Zaldardyń birneshe nusqasyn qarastyryp, darynnyń deńgeiine sai keletin eń úzdigin tańdap alǵymyz keledi. Sondyqtan, jyldyń sońynda AQSh-ta kontsertin ótkizýdi kózdep otyrmyz. Qandai zal bolatynyn biz sizderge mindetti túrde habarlaimyz. Bilet satylymy da bastalady», - dedi ministr.
Eske sala ketsek, Dimash Qudaibergenniń AQSh-ta kontserti ótetini buǵan deiin habarlanǵan bolatyn.
«Mádeniet jáne sport ministrligi 2019 jyldyń III toqsanynda Niý-Iorkte álemge áigili «Madison Square Garden» alańynda Dimash Qudaibergenniń airyqsha shoý-kontsertin ótkizbek. Búgingi tańda atalǵan shoýdy uiymdastyrý jumystary bastalyp ketti», - degen edi burynǵy Mádeniet jáne sport ministri Arystanbek Muhamediuly.
