Dimash Qudaibergenniń Londondaǵy kontsertine qatysqan otbasy men aqtóbelik oqýshy Narǵyz Januzaqova elge oraldy. Sveta Aitbaeva kontsertten keiingi Dimashtyń kóńil-kúii men onyń aldaǵy josparlary jóninde aityp berdi, dep habarlaidy QazAqparat tilshisi.
Aqtóbelikter Dimash Qudaibergenniń otbasy men kontsertte án shyrqaǵan Narǵyz Januzaqovany kútip aldy. Buǵan deiin habarlaǵanymyzdai, aqtóbelik oqýshy Londonda «Elimniń júregi - Astana» ánin oryndap, Dimash Qudaibergenniń alǵysyn aldy.
«Kontsert keremet ótti. Dimash aǵanyń kontsertinde, Indigo at the O2 kontsert zalynda án shyrqap, umytylmas áser aldym. Men úshin bul - úlken mártebe. Ári sapar kezinde Londondy aralap, qaiyqpen júzip, II Elizaveta patshaiymnyń úiin kórý baqyty buiyrdy. Qala tumandy, jaýyndy bolǵanymen, adamǵa jylylyq syilaidy», - deidi jas talant Narǵyz Januzaqova.
Aita keteiik, aqtóbelik oqýshy «Baqytty bala» vokaldyq baiqaýynda jeńimpaz atanyp, ánshi Dimash Qudaibergenniń kontsertinde birge án shyrqaý múmkindigine ie bolǵan edi. Sveta Aitbaeva bul Aqtóbede bastalyp, London sahnasynda jalǵasqan erekshe shara ekenin atap ótti.
«Dimash 2 - 2,5 saǵattyq kontsertti ózi beretin. Bul joly Narǵyz birge án aityp, kórermenin tánti etti. Týǵan jeri Aqtóbeden jas daryn barǵanda fanattary da jaqsy qabyldady. Jankúierler Narǵyzdy óz elderine shaqyrdy», - dedi Sveta Aitbaeva.
Ánshi Dimash Qudaibergen VVS kanalyna suhbat berip, Máskeýge, keiin Qytaiǵa barady. Kestesi tyǵyz bolǵan soń ol týǵan jerine kele almaǵan.
«Dimash Londonda qaldy. Ol taiaýda týǵan jerine, Aqtóbege kelip, tynyǵýdy armandaidy. Biraq kestesi tyǵyz. Londonnan soń Máskeýde óner kórsetip, Qytaiǵa barady. Osy aralyqta ýaqyt taýyp, úiine kelip, demalady dep úmittenemiz. Dimash jumys istep júrip tynyǵatyn adam. Kishkentaiynan eńbekqor. Mýzykalyq mektep, kolledjge bardy, únemi daiyndyqta júrdi. Stýdiiada jańa án jazý, árleý, týyndylardy ómirge ákelý, orkestrmen jumys isteý oǵan kúsh syilaidy. Jas kezinde tynymsyz jumys istegeni durys dep esepteimiz. Fanattaryna aitarym, Dimash jaqsy, ol sharshamady», - dedi Sveta Aitbaeva.
