QR Mádeniet jáne sport ministri Arystanbek Muhamediuly qazaq talanttarynyń shetelde tanylýy týraly syndarǵa jaýap berdi, dep habarlaidy QazAqparat tilshisi.
Ministr Kann festivalinde jeńiske jetken Samal Esliamova men Qytaidaǵy án baiqaýynda top jarǵan Dimash Qudaibergenge erekshe toqtaldy.
"Dimash qytailardyń arqasynda, Samal - frantsýzdardyń arqasynda tanyldy degen pikir halyq arasynda bar. Dimash óziniń Qazaqstanda óskenin, Ulttyq óner ýniversitetinde oqitynyn qansha aitsa da, ony Qytaiǵa telip qoiatyndar tabylady. El arasynda sondai qyzyq psihologiia qalyptasypty", - dedi Arystanbek Muhamediuly Astanada halyq aldynda esep berý kezdesýinde.
Ministr reseilik ánshi Albina Jańabaevanyń jazbasyn mysalǵa keltirdi.
"Reseige tanymal ánshi Albina Djanabaeva Astrahan óńirinde týǵan, onyń ákesi qazaq, adai rýynan. "Voice of Astana" kontsertine kelgende Albina óz talanttarymyzǵa, Batyrhan Shúkenovke, Baiǵali Serkebaevqa qurmetimizdi kórip, riza boldy. Instagram jelisine óziniń qazaq ekenin, qazaqtan shyqqanyn maqtan tutatynyn jazdy, tarihi otanyna sálem joldady. Shettegi qazaqtardyń ózi shyqqan tegin moiyndap jatqanda, óz elimizde ósken talanttardy syrtqa tebý jaramaidy", - dedi ol.
"Dimash báribir tanymal ánshi bolar edi. Sebebi, konkýrstar álemniń barlyq elinde ótedi. Iá, Qytaiǵa barǵany ras. Olai baǵalsaq, Serik Sápievti aǵylshyndardyń kómegimen tanyldy dep aita alamyz ba? Daniiar Eleýsinov - Rio-de-Janeiroda, Olga Shishigina - avstraliialyq kengýrýlardyń arqasynda qalyptasty dei almaimyz ǵoi. Osy úshin halyqaralyq baiqaýlar men olimpiadalar ótkiziledi, talanttardyń tanylýy úshin", - dedi A. Muhamediuly.
