Búgin Astanadaǵy baspasóz máslixatynda Qytai Halyq Respýblikasynyń Qazaqstandaǵy Tótenshe jáne Ókiletti Elshisi Chjan Hanxýei qazaqstandyq ánshi Dimash Qudaibergenniń Qytaidyń mádeni naryǵyndaǵy tańǵajaiyp jetistigine qatysty óz pikirin bildirdi, dep xabarlaidy QazAqparat tilshisi.
"Dimash tańǵajaiyp jetistikke jetti. Ol Qytaidyń jarqyn juldyzyna ainaldy. Árine, qazaqstandyqtar úshin bul - óte úlken bonýs. Ózim sizderdi shyn júrekten quttyqtaimyn! Negizi, qazirgi baiqaýdy kórsetip jatqan "Hýnan" arnasy keńinen tanymal. Onyń efirinen san alýan baǵdarlamalar kórsetiledi. Alaida sheteldiń azamattary kóp túse bermeidi. Dimash bolsa, birden jarq etip, jastardyń kózine tústi, solardyń kózaiymyna ainaldy. Ásirese, jas jetkinshekter ony qatty súiedi, qatty emes, qulai súiedi deýge bolady. Onyń daýysyna ǵana emes, minezine de tánti boldy. Dimashtyń boiynan qazaq xalqynyń mádenieti, Uly Dalanyń minezi barynsha baiqalady. Mine, dál osy qasiet qytailyq kórermenderdiń qyzyǵýshylyǵyn arttyryp otyr. Qytaida Dimash óte tanymal, barlyq kórermender derlik ony biledi. Sondyqtan ol óziniń kásibin Qytaida damyta alady dep oilaimyn. Ol - bir. Ekinshiden, ol Qytaidyń mádeni naryǵynda Qazaqstannyń tanystyrylymyn óte jaqsy jasady. Endi, qazaqstandyqtarǵa Qytaidyń mádeni naryǵyna jol ashyq", - dep atap kórsetti elshi.
Aita keteiik, búgingi baspasóz máslixatynda Chjan Hanxýei Qytaidyń qazirgi áleýmettik-ekonomikalyq jaǵdaiy týraly aityp berdi. Onyń sózine qaraǵanda, Qytaida jyl saiyn 13,1 mln. jańa jumys oryny ashylyp turady. Odan bólek, elshi Astanadaǵy EKSPO kezinde qytailyqtarǵa jatyn oryndardyń jetetinine kúdiktenip otyr. Sondai-aq Chjan Hanxýei "qytailyq qater" týraly mifti joqqa shyǵarýǵa tyrysty.
