Ánshi Dimash Qudaibergenniń Astanada ótetin «Arnaý» atty kontsertiniń kúni belgilendi, dep habarlaidy QazAqparat tilshisi.
Bul týraly ánshiniń ózi Instagram paraqshasynda jazdy.
«Kún belgilendi! Bul eń úzdik shoý bolmaq. Bilet satylymy týraly keiinirek habarlaimyz. Qazaqstanda 29 maýsymda kóriskenshe!», - dep jazdy ánshi.
Eske sala ketsek, buǵan deiin Dimash Qudaibergen Jastar jyly aiasynda Astanada «Arnaý» atty kontsert beretinin habarlaǵan bolatynbyz.
«Biz sizdermen úlken mańyzdy jańalyqty bóliskimiz keledi. Biz óz tarapymyzdan talantty jastardy qoldaýǵa daiynbyz. Onyń ústine ózderińiz biletindei, biylǵy jyl Jastar jyly dep jariialanǵan bolatyn. Dimash elimizdiń, halqymyzdyń birtýar azamaty, qazaqtyń óneri arqyly elimizdiń atyn búkil álemge tanytyp júrgen talantty tulǵa. Bunyń aldynda Dimash Ulttyq arnadaǵy jańa jyldyq shoýǵa qatysqan bolatyn. Al búgingi aitylyp jatqan joba boiynsha biz Dimashpen birneshe ret kezdesip, aqyldasqan bolatynbyz», - degen edi OKQ-da ótken baspasóz máslihatynda «Qazaqstan» RTRK AQ tóraǵasy Erlan Qarin.
Onyń aitýynsha, Dimashtyń Astanadaǵy kontsertinde álemdik shoýlardaǵy tehnologiialar paidalanylady.
