Qazaqstandyq ánshi Dimash Qudaibergen Reseidegi 2019 jylǵy eń stildi erler baiqaýynda alǵashqy orynda kele jatyr, dep habarlaidy QazAqparat.
Dimash Qudaibergenniń amerikalyq jankúierleriniń klýby Instagramdaǵy paraqshasynda ánshiniń Reseidegi eń stildi erler baiqaýyna qatysyp jatqanyna bailanysty quttyqtaý joldady. HELLO! jýrnaly men HELLO.RU saitynda eń stildi juldyzdar baiqaýy ótip jatyr. Ár apta saiyn basylym «Reseidegi eń stildi juldyzdar - 2019» ataǵyna úmitkerlerdiń «Klassika», «Casual», «Bogemdyq saltanat», «Eń stildi jup» atalymdary boiynsha esimderi men sýretterin jariialaidy. Ár atalym boiynsha jeńimpazdardy sms-habarlama jiberý arqyly oqyrmandar anyqtaidy. «HELLO!» jýrnaly atap ótkendei, «erekshe áser qaldyra alatyn tabysty, jarqyn jáne talantty keiipkerler konkýrsqa qatysady, olar stildi kiingen adam árdaiym jeńimpaz bolatynyn dáleldeidi». Dimashpen birge «Eń stildi adam» ataǵyn alý úshin telejúrgizýshi Ivan Ýrgant, rejisser, akter jáne prodiýser Fedor Bondarchýk, sondai-aq reitingi joǵary akter jáne shoý-biznes ókili Andrei Býrkovskii, prodiýser Aleksei Kiselev siiaqty tanymal adamdar baq synaýda.
«5 oktavadan asatyn biregei daýys iesi Dimash Qudaibergen Qytaidy ózine qaratty, al 22 naýryzda ol reseilik Kremldi de tańdandyrady», degen basylym ánshiniń aldaǵy Máskeýde ótetin kontsertin eske saldy. Dimashusafanclub atap ótkendei, daýys berýdiń alǵashqy kúninen bastap Dimash óziniń qarsylastarynan oq boiy ozyp keledi - daýys berýdiń sońyna qarai Dimash daýystyń 89 paiyzyn ielendi. Marapattaý sáýir aiynda ótedi.
Budan ózge, búgin Dimash Qudaibergenniń 29 maýsym kúni Astanada ótetin jeke kontsertine biletter satyla bastaidy. Bilet quny 500 teńgeden bastalady.
