Nazarbaev Ziiatkerlik mektepteriniń túlekteri úshin onlain formatta sońǵy qońyraý soǵyldy. Túlekterdi qýanyshty sátpen belgili ánshi Dimash Qudaibergen quttyqtady, dep habarlaidy "Ult aqparat".
Petropavldaǵy Nazarbaev Ziiatkerlik mektebi baspasóz qyzmetiniń málimetinshe, biyl Qazaqstan boiynsha Derbes bilim berý uiymyn eki myńnan astam oqýshy támámdap otyr, onyń 108-i soltústikqazaqstandyq jas.
Onlain formatta ótken sońǵy qońyraý ádettegidei memlekettik ánuranmen bastaldy. Eki júrgizýshi merekelik baǵdarlamany ashyp, qonaqtarǵa sóz berdi. Saltanatty sharaǵa kompiýter, uialy telefon arqyly muǵalimder, túlekter, ata-analar – barlyǵy 300-den astam adam qosyldy.
«Búgingi kún men úshin erekshe. Adamnyń ómirinde bir-aq ret bolatyn sońǵy qońyraý merekesi. Tek pandemiianyń kesirinen ony úide ótkizýge májbúr boldyq. Ókinishti árine. Biraq biz qiyndyqty eńserip, alǵa qarai umtyla bilýimiz qajet. Sondyqtan bul jaǵdaidy synaq dep bilemin. Bizdiń aldymyzda taǵy bir synaq tur. Ol ózimiz tańdaǵan joǵary oqý ornyna túsý. Bolashaǵymdy injenerlik salamen bailanystyrǵym keledi. Qujattarymdy Túrkiia, Vengriia, Resei syndy memleketterdiń joǵary oqý oryndaryna tapsyrdym», - deidi Petropavldaǵy Nazarbaev Ziiatkerlik mektebiniń túlegi Aqjan Joldybaev.
Saltanatty shara Microsoft Teams platformasynda ótti. Qýanysh ielerin belgili ánshi Dimash Qudaibergen de quttyqtady.
«Nazarbaev Ziiatkerlik mektebiniń ustazdary, jarqyn ómirge, bolashaqqa, kemel qadam basqaly jatqan mektep bitirýshi túlekter! Sizderge mol baqyt, qajymas qairat tileimin. Elimizdiń erteńi úshin talmai eńbek etip, biik belesterden kórinetinderińizge senemin. Barlyq arman-maqsattaryńyzǵa jete berińizder», - dedi tanymal ánshi arnaiy joldaǵan videoquttyqtaýda.
Mektep direktory 4-shi toqsannyń ońai bolmaǵanyn, degenmen ujym jańa tájiribe alǵanyn atap ótti.
«4-shi toqsandy qashyqtan oqyp shyqtyq. Búgingi merekelik shara da onlain formatta ótti. Sońǵy qońyraý – emotsiiaǵa, qimastyqqa, qýanyshtyń kóz jasy men shat kúlkige toly mereke. Búgin ádettegidei sán-saltanatymen ótpese de, bul kún barshamyzdyń jadymyzda saqtalary anyq. Bolashaqta mundai qiyndyqtar bolmasa eken dep tileimin», - dedi bilim ordasynyń direktory Nurǵali Elshibekov.
Nazarbaev Ziiatkerlik mektepteriniń túlekterine attestat tapsyrý rásimi 15 maýsymda ótedi dep josparlanǵan.
