Dimash Qudaibergen Qytaida ótip jatqan «I am a singer» baiqaýynyń tórtinshi kezeńinde úshinshi oryn ielendi, dep habarlaidy Ult.kz tilshisi «QazAqparat» agenttigine silteme jasap.
«Birinshi oryndy «Siao Tszinten Shitszy» («Lion») toby, ekinshi oryndy - Lin Ilian, úshinshi - Dimash, tórtinshi - Dý Lisha, besinshi - Chjan Tsze, altynshy - Tan Tszin (úshinshi kezeńde birinshi oryn alǵan bolatyn) jáne jetinshi oryndy Chjao Lei ielendi», - dep habarlaidy qytailyq BAQ.
«Weibo» áleýmettik jelisindegi Dimashtyń jumys tobynyń paraqshasynda baiqaýdyń 4-kezeńindegi sýretter jariialandy. Onda ártistiń stilisi BG Fashion, vizajisi ári shashtarazy DO Fashion ekendigi jazylǵan.
Ánshiniń kiimi - Gucci 17SS, moiynoraǵyshy - Paul Smith 17SS, shliapasy - Albertus Swanepoel, aiaq kiimi - Gucci 17SS, júzigi - H&M, bilezigi Japoniiadan.
Eske salaiyq, buǵan deiin «Sinhýa» agenttigi Dimash Qudaibergen atalmysh baiqaýdyń 4-kezeńinde qytai tilindegi ándi aktsentsiz aityp bergenin habarlaǵan bolatyn. Sondai-aq Dimash eýropalyq úlgidegi pidjak pen jibek moiynoraǵyshynda tartymdy kóringeni jazylǵan edi. Onyń boiyna kóz tartarlyq kelbetti qara tústi bas kiimi keltirip turdy.
«I am a singer» baiqaýynyń tórtinshi kezeńi 2 aqpan kúni jazylǵan edi. Ol telearnalardan 11 aqpan kúni Astana ýaqytymen saǵat 20:30-da kórsetiledi. Dimashtyń bul kezeń úshin tańdaǵan «Kúzgi muń» ánin 2013 jyly «I am a singer» baiqaýynda qytailyq ánshi Sha Baolian oryndaǵan bolatyn.
Keshe qazaqstandyq jas talant iesiniń anasy Svetlana Aitbaeva onyń atalmysh baiqaý barysynda qazaq tilinde de án aitatynyn jetkizgen bolatyn.
Aita keteiik, Qytai telearnasyndaǵy án baiqaýyna qatysyp jatqan otandasymyz onyń eki kezeńinde - birinshi, úshinshisinde 3-oryn alǵan bolatyn. Onyń qytailyq áleýmettik jelidegi jazýshylar sany millionnan asty, oǵan aqyndar óleń-jyrlar arnap, qyzdar qazaqsha úirenip, hattar jazýda. Jankúierler óz paraqshalaryn Dimashtyń sýretterine toltyrýda. Tipti, Qytai dúkenderinde otandasymyzdyń kelbeti beinelengen buiymdar, turmystyq zattar satyla bastady.
Dimashtyń ónerine tánti bolǵan álemge tanymal ánshi Lara Fabian onymen kezdeskisi keletinin aitty. Al kúni keshe ǵana belgili akter, kinorejisser Djeki Chan D.Qudaibergenovti kezdesýge shaqyryp, arqa-jarqa áńgimelesken bolatyn.
Dimash Qudaibergen Qazaq ulttyq óner ýniversitetiniń 3-kýrs stýdenti. Keshe JOO-nyń rektory Aiman Musaqojaeva jas talant aldaǵy ýaqytta «Evrovideniege», odan keiin «Amerika daýysyna» qatysatyndyǵyn aitty.
