Dimash Qudaibergen Qulsary qalasyna kelip, sý tasqynynan zardap shekken turǵyndarmen kezdesti.
Tanymal ánshi sý tasqynynan zardap shekken Qulsary turǵyndaryna qoldaý bildirdi.
«Qiyn-qystaý kúnderde bir jaǵadan bas, bir jeńnen qol shyǵaryp, osylai bir-birimizge kómek kórsetip júrýge jazsyn. Eń bastysy elimiz aman, jurtymyz tynysh bolsyn. Qazirgi tańda bizge birlik kerek. Sabyr saqtaý kerek. Qudaidan úlken úmitpen jaqsylyq tileiik», - dedi Dimash Qudaibergen.
Ánshiniń qiyndyqqa tap bolǵan jurttyń ortasyna kelip, janashyrlyq tanytyp jatqanyna qulsarylyqtar riza bolyp, alǵysyn aitty.
«Ózińiz kelip, kórinip, qoldaý bildirip jatqanyńyzǵa kóp-kóp rahmet», - dedi aýyl turǵyndarynyń biri.
Sondai-aq, Dimash: «Memleket tarapynan jaǵdai jasalady dep jańalyqtardan oqyp jatyrmyn, men de prezidentimiz aitqan soń sizdermen birge osyǵan senip otyrmyn. Búgingi kúni osy jerge kelýimizge osyndai jaǵdai sebep bolsa, aldaǵy ýaqytta tek qýanysh sebepterge kelip, qýanyshty ulǵaita bereiik», - dep, kópshilikti erteńge úmitpen qaraýǵa shaqyrdy.
Tabiǵi apatpen tynbai kúresip jatqan sarbazdar jáne eriktilermen de júzdesip, jumys barysymen tanysty. Odan bólek, besinshi aýdannyń aq jaýlyqty analary ázirlegen aittyq dastarhannan dám tatty.
