Qazaqstandyq ánshi Dimash Qudaibergen koronavirýs pandemiiasyna qarsy kúreske án arnady, dep habarlaidy "Ult aqparat".
Dimashtyń «We Are One» (Biz birgemiz) atty jańa ánine túsirilgen beinebaian «VKontakte» áleýmettik jelisindegi «Sinhýa jańalyqtary| Xinhua News»paraqshasynda jariialandy. Beinebaianda virýstyń alǵashqy oshaǵy – Ýhan qalasy – dárigerler, volonterler, maska taqqan adamdar, gýmanitarlyq kómektiń qabyldanýy, dúkenniń bos qalǵan sóreleri kórsetilgen.
Video sońynda aspandaǵy bult seiilip, dárigerlerdiń qýanyshy, maskalaryn sheship tastaǵan balalardyń máz-meiram kezi kórsetilgen.
«Búkil álem korrnavirýspen kúresip, basynan qiyn kúnderdi ótkizip jatyr. Aty jaman aýrýǵa qarsy kúsh biriktirip, bir-birimizge qol ushyn sozǵanda ǵana COVID-19-dy jeńe alamyz. Bul án aldyńǵy shepte júrgen dárigerler men oqshaýlanyp otyrǵandarǵa arnalady», - delingen beinebaian sipattamasynda.
«We Are One» - ániniń sózin Gao Shang/Shang Yang, al áýenin Dong Nan/Tang Yi jazǵan.
Dimash jańa áni týraly óziniń Instagram-paraqshasyna áli jariialamasa da, onyń ónerin baǵalaýshylar beinebaiandy talqylap jatyr.
«Bul án qaiǵy, qiyndyq, sonymen qatar bir-birimizge qol ushyn sozǵan jaǵdaida qiyndyqty eńseretinimizge sený týraly. Bastysy – ony jeńetinimizge senim men úmitti joǵaltpaý...», - dep jazdy «VKontakte» qoldanýshysy Polina Polinskaia Dimashtyń eýraziialyq fan-klýbynyń paraqshasyna.
Buǵan deiin Dimash Qudaibergen koronavirýspen kúresip jatqan meditsina qyzmetkerlerine alǵys aitqan bolatyn.
Sondai-aq, ol jankúierlerinen pandemiia kezinde úide otyrýdy ótindi.
15 naýryzda Dimash «Arnau tour» dúniejúzilik týrnesin keiinge shegergeni belgili boldy.
14 sáýirde ol mamyr aiynda Tokioda ótýi kerek kontserttiń bolmaitynyn aitty.
