Sýret: dimashnews.com
Álemge áigili ánshi ári kompozitor Dimash Qudaibergen Halyqaralyq kóshi-qon uiymynyń (HKU) izgi niet elshileriniń qataryna qosyldy, dep habarlaidy "Ult aqparat" "QazAqparat" Halyqaralyq agenttigine silteme jasap.
HKU búgin ártister, sýretshi, sportshy jáne basqa da belgili tulǵalardan turatyn toǵyz izgi niet elshisi taǵaiyndalǵanyn habarlady. Ótken jyldyń qarasha aiynda olimpiada chempiony Mo Farah alǵashqy jahandyq elshi bolǵan edi.
Izgi niet elshileri kóshi-qon múmkindikterine qoldaý kórsetip, álem boiynsha talanttardyń tanylýyna yqpal etedi. Toǵyz elshi qatarynda segiz jeke tulǵa jáne bir fýtbol klýby bar.
«Men bul tanymal tulǵalardy HKU-nyń jańa aimaqtyq jáne ulttyq izgi niet elshileri retinde qarsy alǵanyma óte qýanyshtymyn. Olar dúnie júzi boiynsha shabyt syilaýshylar. Olarmen kúsh-jigerimizdi biriktire otyryp, ózgeris jasaitynymyzǵa senemin», - dedi HKU Bas direktory Emi Pop.
«HKU izgi nietti elshisi retinde men migranttardyń quqyǵyn qorǵaitynymdy maqtan tutamyn. Ár adamnyń quqyǵy qorǵalǵan jáne múmkindikterge ashyq álem úshin birigeiik», - dedi ánshi Dimash Qudaibergen.
Izgi niet elshilerin óz elderindegi HKU ókilderi resmi túrde taǵaiyndady jáne olardy muqiiat baǵalaýdan keiin tańdady.
«Otbasylyq tájiribemnen aita alamyn, kóshi-qon durys júrgizilse, paidasy kóp. HKU izgi nietti elshisi retinde men mádeni muram men sporttyq tájiribemdi aqparattandyrýdy joǵarylatý úshin paidalanǵym keledi», - dedi tanymal fýtbolshy Mýktar Diakabi.
Dimash Qudaibergenmen birge HKU izgi niet elshileri qatarynda ganalyq aktrisa jáne telejúrgizýshi Ama K. Aberez, Argentina/Arýbadan fotograf Nikolas Marin Benites, Mavrikii fotografy Pol Choi, gvineialyq fýtbolshy Mýktar Diakabi, Ganadan kelgen mýzykant jáne án jazýshy Kofi Kinaata, bosniialyq basketbolshy Djanan Musa, Albaniia psihology, jýrnalist ári jazýshy Mirela Sýla, sondai-aq ýrýgvailyq Atletiko Peniarol fýtbol klýby bar.
1951 jyly negizi qalanǵan HBU – kóshi-qon salasyndaǵy jetekshi úkimetaralyq uiym. HBU BUU júiesine 2016 jyly baýyrlas uiym retinde qosyldy.
